ABŞ Prezidenti Donald Tramp Fransada keçirilən G7 sammiti çərçivəsində İtaliyanın Baş naziri Corcia Meloni haqqında səsləndirdiyi fikirlərlə diqqət çəkib.

Qanuntv.az xəbər verir ki, Tramp bu barədə İtaliyanın "La7" televiziya kanalının jurnalisti ilə telefon danışığı zamanı danışıb.

ABŞ liderinin sözlərinə görə, Meloni onunla şəkil çəkdirmək üçün israr edib:

"Böyük ehtimalla, o mənimlə danışdığına görə çox sevinir. Mən onunla söhbət etməyə məcbur deyildim. O mənimlə birgə foto çəkdirməyim üçün mənə yalvarırdı. O bunu o qədər çox istəyirdi. Mən bu xahişi rədd edə bilərdim, lakin sadəcə ona yazığım gəldi", - deyə Tramp bildirib.

Ağ Ev rəhbərinin bu açıqlaması İtaliyada geniş rezonans doğurub. Baş nazir Corcia Meloni isə "X" sosial şəbəkəsində paylaşdığı açıqlama ilə Trampın iddialarını təkzib edib.

Meloni bildirib ki, Trampın səsləndirdiyi fikirlər həqiqəti əks etdirmir:

"Bəzi şeylərə dərhal cavab verilməlidir. Donald Trampın açıqlamaları tamamilə uydurmadır. ABŞ prezidentinin müttəfiqləri ilə niyə belə davrandığını bilmirəm. Düzünü desəm, şoka düşdüm. İtaliya və mən heç vaxt yalvarmırıq", - deyə o qeyd edib.

Qeyd edək ki, Tramp və Meloni arasında səslənən bu qarşılıqlı bəyanatlar beynəlxalq mediada geniş müzakirələrə səbəb olub.