ABŞ Prezidenti Donald Tramp ölkəsinin yaxın gələcəkdə Marsa idarəolunan kosmik uçuş həyata keçirə biləcəyini bildirib.
Qanuntv.az xəbər verir ki, bu barədə Tramp Vaşinqtonda ABŞ Müstəqillik Bəyannaməsinin imzalanmasının 250-ci ildönümünə həsr olunmuş tədbirdə çıxışı zamanı danışıb.
"Biz çox yaxında Marsa yollanacağıq. Hesab edirəm ki, biz Ayı fəth edib daha da irəli gedəcəyik. Sonra isə istiqamətimiz Mars olacaq", – deyə ABŞ prezidenti qeyd edib.
Donald Tramp həmçinin xatırladıb ki, onun ilk prezidentlik müddəti dövründə administrasiyasının təşəbbüsü ilə ABŞ Kosmik Qüvvələri yaradılıb.
"Bəziləri buna rişxənd edirdi və bunun axmaqlıq olduğunu düşünürdü. İndi isə anlayırlar ki, bu, gördüyümüz ən mühüm işlərdən biridir. Biz kosmosda Çin və Rusiyadan geri qalırdıq, indi isə böyük addımlarla irəlidəyik", – deyə Tramp bildirib.
Qeyd edək ki, ABŞ Milli Aeronavtika və Kosmik Tədqiqatlar Agentliyinin (NASA) rəhbəri Cared Ayzekman may ayında verdiyi açıqlamada qurumun 2032-ci ilə qədər Ayda daimi ABŞ stansiyası yaratmağı planlaşdırdığını açıqlamışdı. Bildirilir ki, Ayda sınaqdan keçiriləcək texnologiyalar gələcəkdə Marsa insanlı missiyanın həyata keçirilməsinə imkan yarada bilər.
NASA rəsmilərinin qiymətləndirməsinə görə, Marsa idarəolunan missiyanın 2040-cı ilə qədər reallaşdırılması mümkün hesab olunur.
