Koreya Xalq Demokratik Respublikasının (KXDR) rəhbərliyi ölkənin nüvə qüvvələrinin həm keyfiyyət, həm də kəmiyyət baxımından daha da gücləndirilməsi barədə qərar qəbul edib.

Qərar ölkə lideri sədrliyi ilə keçirilən Koreya Əmək Partiyasının 9-cu çağırış Mərkəzi Hərbi Komitəsinin genişləndirilmiş iclasında qəbul olunub.

İclas zamanı döyüş sistemlərinin texniki infrastrukturunun modernləşdirilməsi, müdafiə imkanlarının artırılması və ölkənin nüvə potensialının daha da inkişaf etdirilməsi istiqamətində bir sıra tədbirlər təsdiqlənib.

Məlumata görə, Kim Çen In Mərkəzi Hərbi Komitə tərəfindən müzakirəyə çıxarılan əsas hərbi məsələlərlə bağlı yeddi əmr imzalayıb.

Bundan əvvəl Şimali Koreya lideri ölkənin hərbi dəniz qüvvələrinin strateji imkanlara malik tamhüquqlu silahlı qüvvə növünə çevrilməsinin vacibliyini vurğulamışdı. O, həmçinin KXDR donanmasının gələcəkdə nüvə silahları ilə təchiz edilməsinin planlaşdırıldığını bəyan etmişdi.

Ekspertlər hesab edirlər ki, Şimali Koreyanın nüvə və raket proqramlarının genişləndirilməsi regionda təhlükəsizlik məsələləri ilə bağlı narahatlıqları daha da artıracaq və beynəlxalq ictimaiyyət tərəfindən diqqətlə izləniləcək.