“Qarabağ” klubunun baş məşqçisi Qurban Qurbanov komandanın heyətinə cəlb olunması planlaşdırılan yeni transferlə bağlı ərizədə dəyişiklik etmək istədiklərini, lakin son anda gözlənilməz problemin ortaya çıxdığını açıqlayıb.

Qanuntv.az xəbər verir ki, təcrübəli mütəxəssis UEFA Konfrans Liqasının pley-off mərhələsində Niderlandın “Tvente” klubuna qarşı keçiriləcək ilk görüşdən əvvəl təşkil olunan mətbuat konfransında transfer məsələsinə də toxunub.

Qurban Qurbanov bildirib ki, yeni futbolçunun heyətə əlavə olunması ilə bağlı bütün işlərin başa çatdırılması gözlənilsə də, son anda yaranan problem səbəbindən proses təxirə salınıb.

“Dünən ərizədə bir dəyişiklik olmalı idi, amma qaldı. Sanki bütün işlər tamamlanırdı. Bunu yeni transferlə bağlı deyirəm. Lakin birdən-birə problem ortaya çıxdı və məsələ təxirə düşdü”, – deyə baş məşqçi bildirib.

Mətbuat konfransında Jeremi Qnalinin gələcək karyerası və “Qarabağ”dakı vəziyyəti barədə də danışılıb.

Qurbanov futbolçunun gənc və perspektivli olduğunu qeyd edərək, klub axtarması ilə bağlı ona məlumat verildiyini bildirib.

Baş məşqçi qeyd edib ki, Qnalinin ardıcıl bir neçə oyunda meydana çıxması onun əvvəlki idman formasını bərpa etməsinə kömək edə bilərdi. Lakin komandada həmin mövqedə ciddi rəqabətin olduğunu vurğulayıb.

Qurban Qurbanovun sözlərinə görə, həmin mövqedə Elvin Cəfərquliyev və Toral Bayramov çıxış edib, hazırda isə heyətə Bruno Lanqa da qoşulub. Bu səbəbdən futbolçunun əsas heyətdə yer uğrunda mübarizə aparması asan deyil.

Qeyd edək ki, “Tvente” – “Qarabağ” arasında UEFA Konfrans Liqasının pley-off mərhələsinin ilk oyunu bu gün – avqustun 20-də Bakı vaxtı ilə saat 22:00-da başlayacaq.

Cütün cavab qarşılaşması isə avqustun 27-də, saat 20:00-da Tofiq Bəhramov adına Respublika stadionunda keçiriləcək.