Avqustun 20-nə keçən gecə Rusiya ordusunun Ukraynanın paytaxtı Kiyevə endirdiyi kütləvi raket zərbələri nəticəsində ölənlərin sayı 15 nəfərə çatıb.

Qanuntv.az xəbər verir ki, bu barədə Kiyev şəhərinin meri Vitali Kliçko məlumat yayıb.

Şəhər rəhbərinin sözlərinə görə, tibbi personalın təqdim etdiyi son məlumatlara əsasən, hücum nəticəsində 15 nəfər həyatını itirib. Daha əvvəl ölənlərin sayının 12, yaralıların sayının isə 33 nəfər olduğu bildirilmişdi.

Kiyev Şəhər Hərbi Administrasiyasının məlumatına əsasən, hücumun nəticələri paytaxtın bir neçə rayonunda 12-dən çox ərazidə qeydə alınıb. Zərbələr nəticəsində yaşayış binalarına, tibb müəssisəsinə və təhsil obyektinə ciddi ziyan dəyib.

Həmçinin geniş ərazini əhatə edən anbarlarda yanğınlar baş verib. Hadisə yerində xilasedicilər və digər aidiyyəti qurumların əməkdaşları fəaliyyət göstərərək dağıntıların aradan qaldırılması və təhlükəsizlik tədbirlərini həyata keçirirlər.

Məlumata görə, Kiyev ballistik raketlərin kütləvi hücumuna məruz qalıb. Bildirilir ki, təxminən 15 dəqiqə ərzində şəhərə 20-yə yaxın raket atılıb.

Hücumun ağır nəticələri ilə əlaqədar Kiyevdə matəm elan olunub.

Ukrayna rəsmiləri hadisənin nəticələrinin araşdırıldığını və zərbələrin vurduğu ərazilərdə xilasetmə işlərinin davam etdirildiyini bildiriblər.