Abşeron rayonunun Qobu qəsəbəsində iki futbolçunun ölümü ilə nəticələnən ağır yol-nəqliyyat hadisəsi ilə bağlı yeni açıqlama verilib.
Hadisədə adı hallanan göy rəngli “Toyota Corolla” avtomobilinin sahibi Yaşar Bağırov bildirib ki, qəzanın baş verməsində onun idarə etdiyi avtomobilin hər hansı təması olmayıb və avtomobilində qəza nəticəsində yaranmış zədə aşkar edilməyib.
Y.Bağırovun sözlərinə görə, iyulun 29-da hadisə zamanı qarşısındakı nəqliyyat vasitəsini ötmək istəyərkən mərhum Rauf Hüseynovun idarə etdiyi avtomobillə üzbəüz gəlib. O, təhlükəni gördükdən sonra yenidən öz hərəkət zolağına qayıtdığını və avtomobillər arasında heç bir təmas olmadığını deyib.
Avtomobil sahibi qeyd edib ki, həmin ərazidən keçdikdən sonra Rauf Hüseynovun avtomobilinin qəza etdiyini görməyib və hadisənin necə baş verdiyindən xəbərsiz olub. Onun sözlərinə görə, yalnız əməliyyatçılar evinə gəldikdən sonra qəza barədə məlumat əldə edib.
Y.Bağırov bildirib ki, hadisə zamanı avtomobildə ailə üzvləri də olub. Qəzadan bir neçə saat sonra əməliyyatçıların onun evinə gəldiyini və onu avtomobili ilə birlikdə ekspertizaya apardığını deyib.
“Avtomobilimə baxış keçirilərkən heç bir zədə, cızıq və ya qəza nəticəsində yaranmış hər hansı iz aşkar edilməyib”, – deyə o bildirib.
Avtomobilin hadisədən sonra rəngləndirilməsi və həmin vaxt sükan arxasında onun deyil, oğlunun olması barədə iddiaları da Y.Bağırov təkzib edib. O, avtomobilin qəzadan sonra rəngləndirilməsi ilə bağlı ekspertiza tərəfindən hər hansı sübutun təsdiqlənmədiyini bildirib.
Hadisə ilə bağlı digər tərəfin mövqeyində isə fərqli iddialar səsləndirilib. Mərhum Rauf Hüseynovun həyat yoldaşı Şölə Hüseynova qəza görüntülərinə əsasən hadisəyə “Toyota Corolla” markalı avtomobilin səbəb olduğunu bildirib. Onun iddiasına görə, qarşı istiqamətdən gələn avtomobil ötmə manevri zamanı Rauf Hüseynovun idarə etdiyi avtomobilə toxunub və nəticədə avtomobil idarəetmədən çıxaraq qarşı tərəfdən gələn “QazEL” markalı yük maşını ilə toqquşub.
Nəticədə Rauf Hüseynov və avtomobildə sərnişin olan Bəhruz Sultanov hadisə yerində həyatını itirib. Yük avtomobilinin sürücüsü isə xəsarət alıb.
Daxili İşlər Nazirliyinin məlumatına görə, hadisə iyulun 29-da saat 12 radələrində Lökbatan-Qobu yolunda baş verib. Nazirliyin açıqlamasında bildirilir ki, Y.Bağırovun idarə etdiyi “Toyota” markalı avtomobilin hərəkət istiqamətini dəyişərək qarşıdan gələn nəqliyyat vasitəsinin yoluna çıxması nəticəsində R.Hüseynovun idarə etdiyi avtomobil hərəkət istiqamətini dəyişib və qarşı tərəfdən gələn yük avtomobili ilə toqquşub.
Faktla bağlı Abşeron Rayon Polis İdarəsinin İstintaq Şöbəsində Cinayət Məcəlləsinin müvafiq maddəsi ilə cinayət işi başlanılıb. Y.Bağırov şübhəli şəxs qismində tutulub, daha sonra təqsirləndirilən şəxs qismində istintaqa cəlb edilib. Onun barəsində məhkəmənin qərarı ilə həbs olmayan alternativ qətimkan tədbiri seçilib.
Hazırda cinayət işi üzrə istintaq davam etdirilir. Tərəflərin qarşılıqlı iddialarının hüquqi qiyməti istintaq çərçivəsində müəyyənləşdiriləcək.
Qeyd edək ki, Rauf Hüseynov və Bəhruz Sultanov “Qobu” futbol klubunun üzvləri olublar. Onlar futbolçu olmaqla yanaşı, məşqçilik fəaliyyəti ilə də məşğul olublar.
Qanuntv.az
