Şəmkirdə avqustun 17-də baş verən ağır yol-nəqliyyat hadisəsində həyatını itirən 6 nəfərdən biri olan Elvin Məmmədovun bu gün doğum günü olacaqdı.
Qanuntv.az xəbər verir ki, 2009-cu il təvəllüdlü Elvin Məmmədov VAZ-2106 markalı avtomobilin sərnişini olub. O, Mahmudlu kənd sakini idi.
Məlumata görə, qəzaya düşən şəxslər Dəllər-Cəyir kəndində bu gün keçirilməsi nəzərdə tutulan kiçik toy mərasimindən əvvəl təşkil olunan “ciyər axşamı”na gedirmişlər.
Hadisə Bakı-Qazax magistral yolunun Şəmkir rayonunun Əliyaqublu kəndi ərazisindən keçən hissəsində baş verib. VAZ-2106 markalı avtomobillə KIA markalı minik avtomobilinin toqquşması nəticəsində 6 nəfər həyatını itirib, 7 nəfər isə xəsarət alıb.
Vəfat edənlərdən biri VAZ-2106-nın sürücüsü Əlizamin Aslanov olub. Onun 5 yaşlı oğlu Qoşqar Aslanovun da qəza nəticəsində ağır xəsarət aldığı bildirilir.
Əlizamin Aslanovun qardaşı Polad Aslanov bildirib ki, qəza zamanı KIA markalı avtomobil yüksək sürətlə hərəkət edib. Onun sözlərinə görə, xəstəxanada KIA-nın sürücüsü ilə görüşüb və sürücü hadisədə günahın özündə olduğunu deyib.
Qəza ilə bağlı araşdırma başlanılıb. Hadisənin bütün təfərrüatları və qəzanın başvermə səbəbləri araşdırmanın nəticələrindən sonra məlum olacaq.
Ən ağrılı məqamlardan biri isə 2009-cu il təvəllüdlü Elvin Məmmədovun məhz bu gün doğum gününü qeyd etməli olmasıdır.
