"Neftin kəskin ucuzlaşmasının əsas səbəbi OPEK-in gələn il üçün proqnozları yeniləməsi oldu".

Bu sözləri Oxu.Az-a açıqlamasında iqtisadçı Xalid Kərimli dünya bazarında neftin ucuzlaşmasını şərh edərkən deyib.

Onun sözlərinə görə, ABŞ Enerji Agentliyinin 7 noyabrda neft ehtiyatları ilə bağlı məlumatı da qiymətlərə neqativ təsir edib:

"12 noyabr tarixində birjalarda neftin qiymətinin kəskin aşağı düşməsinin səbəbi OPEK-in 2026-cı il üçün proqnozlarını dəyişməsi oldu. Belə ki, OPEK əvvəlki proqnozlarında göstərirdi ki, tələb təklifi üstələyəcək, bu dəfə isə təklifin tələbdən bir az çox olacağını bəyan etdi. Təbii ki, hasilatın artması ilə bağlı proqnozlar bazara mənfi təsir göstərdi. Birjalar da dərhal bu xəbərə reaksiya verdilər.

İkinci bir məqam isə ABŞ Enerji Agentliyinin ötən həftənin sonunda ehtiyatlarla bağlı yaydığı məlumatla bağlıdır. Həmin məlumatda bildirilirdi ki, Amerikada neft ehtiyatları 1.3 milyon barel artıb.

Bundan başqa, ABŞ neft hasilatını bu il kəskin artırıb. Gələn il üçün də Amerikada hasilatın artacağı gözlənilir. Yəni neft qiymətlərinə mənfi təsir edən bu cür məlumatlar son vaxtlar artıb. Bu baxımdan neftin qiyməti birdən-birə 3.8 faizə qədər düşüb.

İqtisadçı hesab edir ki, dünyada xüsusi fors-major hadisə baş verməsə, neft müəyyən qədər ucuzlaşmaqda davam edəcək.

Qeyd edək ki, Dünya bazarında "Azeri Light" markalı Azərbaycan neftinin 1 barelinin qiyməti 12 noyabrda 2.35 dollar azalaraq 65,43 dollara düşüb. Bu gün də birjalarda eniş davam edib. Neft dünənki qiymətlərlə müqayisədə bu gün 0.17 faiz ucuzlaşıb.

Hərracların nəticələrinə görə, "Brent" markalı neftin yanvar fyuçerslərinin qiyməti 62 ABŞ dolları təşkil edib.