İnvestisiyaların dövlət tərəfindən alınması mexanizmi ilə bağlı qanunvericiliyə dəyişiklik edilməsi təklif olunur.
QanunTV xəbər verir ki, məsələ Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirəyə çıxarılan “İnvestisiya fəaliyyəti haqqında” qanuna təklif olunan dəyişiklikdə əksini tapıb.
Bildirilib ki, hazırda investisiyalar dövlət tərəfindən iki əsasla – dövlət ehtiyacları üçün və rekviziya məqsədilə alına bilər. Rekviziya təbii fəlakətlər, texnoloji qəzalar, epidemiyalar və digər fövqəladə hallar zamanı cəmiyyətin maraqları naminə müvafiq dövlət orqanlarının qərarı ilə həyata keçirilir. Hər iki halda investisiyanın dəyəri qanunun 13.3-cü və 13.4-cü maddələrinə uyğun olaraq investora kompensasiya ödənilməsi yolu ilə təmin edilir.
Təklif olunan dəyişiklik investisiyanın dövlət tərəfindən alınmasının yeni əsasını müəyyən edir. Belə ki, strateji əhəmiyyətə malik investisiyalar Azərbaycan dövlətinin və xalqının maraqlarına zərər vurduqda və ya milli maraqlara zidd olduqda, müstəsna halların qarşısını almaq məqsədilə dövlət tərəfindən alına biləcək.
Qanun layihəsinə əsasən, strateji əhəmiyyət daşıyan investisiyaların dövlət tərəfindən alınması üçün hüquqi baza formalaşdırılır. Bu proses ümumi qaydada – yəni investisiyanın alınması müqabilində investora kompensasiya ödənilməsi ilə həyata keçiriləcək.
Eyni zamanda qeyd olunub ki, strateji investisiyaların dövlət tərəfindən alınması Azərbaycan Respublikasının qanunvericiliyinə uyğun şəkildə reallaşdırılacaq.
