Almaniya Hörmüz boğazında ticarət gəmilərinin qorunması məqsədilə mümkün beynəlxalq hərbi missiyada iştirak etməyəcək.
Qanuntv.az xəbər verir ki, bu barədə Almaniyanın xarici işlər naziri Yohan Vadeful ARD telekanalına müsahibəsində bildirib.
Nazir vurğulayıb ki, Almaniya yaxın gələcəkdə bu münaqişənin fəal iştirakçısı olmayacaq. O, Qırmızı dənizdə aparılan Aspides əməliyyatının Hörmüz boğazına qədər genişləndirilməsi ehtimalına münasibət bildirərkən “Biz tezliklə bu münaqişənin fəal iştirakçısı olacağıqmı? Xeyr” deyə açıqlama verib.
Yohan Vadeful hesab edir ki, Hörmüz boğazında təhlükəsizliyi təmin etməyin əsas yolu İranla danışıqlar aparmaqdır.
Eyni zamanda, Böyük Britaniyanın Baş naziri Kir Starmer də oxşar mövqedən çıxış edir. The Daily Telegraph qəzetinin məlumatına görə, Starmer Donald Trumpın müraciətinə baxmayaraq, boğazda gəmiçiliyin bərpası üçün hərbi gəmilər göndərməkdən imtina edib.
Britaniya Baş nazirinin dəftərxanası bildirib ki, tərəflər Yaxın Şərqdəki mövcud vəziyyəti və dünya gəmiçiliyində fasilələrin aradan qaldırılması üçün Hörmüz boğazının fəaliyyətinin bərpasının əhəmiyyətini müzakirə ediblər.
Daha əvvəl isə ABŞın BMT-dəki daimi nümayəndəsi Mayk Uolts CNN telekanalına müsahibəsində Vaşinqton administrasiyasının digər ölkələrin də Hörmüz boğazından keçən gəmilərin təhlükəsizliyinin təmin olunmasında iştirak etməsində israrlı olduğunu bildirib.
