Qanuntv.az xəbər verir ki, Səudiyyə Ərəbistanının vəliəhd şahzadəsi Məhəmməd bin Salman Əs Səud ABŞ-nin İran əməliyyatlarına qoşulmağı ciddi şəkildə nəzərdən keçirir.
"The Wall Street Journal"ın məlumatına görə, Səudiyyə Ərəbistanı uzun müddət İranı bombalamaq üçün öz obyektlərindən və ya hava məkanından istifadəyə icazə verməkdən imtina edib. Lakin yaxınlarda ABŞ qoşunlarına Ərəbistan yarımadasının qərbindəki Kral Fəhd aviabazasından istifadə etməyə icazə verib.
Eyni zamanda, Səudiyyə rəsmiləri Yəməndə husilərin hərbi əməliyyatlara cəlb olunmasının qarşısını almaq üçün diplomatik vasitələrdən istifadə edirlər. ABŞ və İsrail də bu bölgədə təxribatlardan yayınmağa çalışır.
Yəmənin yüksəkrütbəli hərbi komandanı Abed ət-Tövr bildirib ki, ölkəsi İranın tərəfində müharibəyə müdaxilə edə bilər və Bab-əl-Məndəb boğazını ABŞ və İsrail üçün bağlamağı istisna etmir.
Qeyd edək ki, fevralın 28-də İsrailin müdafiə naziri İsrael Kats İrana qabaqlayıcı zərbə endirdiklərini açıqlayıb, daha sonra ABŞ da əməliyyatda iştirak etdiyini bildirib. İran isə İsrailə onlarla ballistik raket atıb. Nəticədə İsrailin hava hücumundan müdafiə sistemləri işə salınıb və sirenlər səsləndirilib.
Martın 1-də İranın Ali Lideri Əli Xameneinin hücumlar zamanı öldürüldüyü iddia olunub. Bundan sonra İran ABŞ-nin hərbi bazalarının yerləşdiyi qonşu ölkələrə raket zərbələri endirib, hava məkanında məhdudiyyətlər yaranıb və Hörmüz boğazında gəmilərin keçidində ciddi problemlər müşahidə olunub.
