Azərbaycan Respublikasının Prezidenti İlham Əliyev aprelin 7-də Türkiyə Respublikası Ali Məhkəməsinin Baş prokuroru Muhsin Şentürk ilə görüş keçirib.
Qanuntv.az xəbər verir ki, görüş zamanı Muhsin Şentürk qəbula görə minnətdarlığını bildirərək, dövlət başçısı ilə görüşdən böyük şərəf hissi duyduqlarını qeyd edib. O, həmçinin Türkiyə Prezidenti Rəcəb Tayyib Ərdoğanın salamlarını Prezident İlham Əliyevə çatdırıb.
Dövlətimizin başçısı salamlar üçün təşəkkürünü bildirərək, onun da salamlarının Türkiyə Prezidentinə çatdırılmasını xahiş edib.
Görüşdə Azərbaycan və Türkiyə arasında qardaşlıq və strateji müttəfiqlik prinsiplərinə əsaslanan münasibətlərin bütün sahələr üzrə uğurla inkişaf etdiyi vurğulanıb. Qeyd olunub ki, dünyada bu iki ölkə qədər bir-birinə yaxın olan dövlətlər azdır.
Eyni zamanda, prokurorluq orqanları arasında səmərəli əməkdaşlığın qurulduğu diqqətə çatdırılıb. Bu çərçivədə Türk Dövlətləri Təşkilatı daxilində həyata keçirilən birgə fəaliyyətin əhəmiyyəti qeyd edilib, təcrübə mübadiləsinin genişləndirilməsinin vacibliyi vurğulanıb.
Sonda tərəflər əməkdaşlığın gələcək perspektivləri ətrafında fikir mübadiləsi aparıblar.
