Qanuntv.az xəbər verir ki, Çanaqqala şəhərində sevgilisi tərəfindən döyüldüyü bildirilən qadın hakimlə bağlı geniş araşdırma aparılır.

Məlumata görə, Çanaqqala 4-cü Ağır Cinayətlər Məhkəməsinin sabiq sədri olmuş 33 yaşlı hakim 2025-ci ilin dekabr ayında sevgilisi, tikinti mühəndisi Burak Doğan ilə qısqanclıq zəminində ciddi mübahisə yaşayıb.

İddiaya əsasən, Burak Doğan sevgilisinin evində bir kişi vəkil və iki qadınla spirtli içki qəbul etdiyini öyrəndikdən sonra mənzilə gəlib. O, evdə olan şəxsləri bıçaqla hədələyərək çıxarıb, daha sonra qadını yataq otağında döyüb.

Xəstəxanaya yerləşdirilən qadının yanaq sümüyünün sındığı müəyyən edilib. Hadisədən sonra Burak Doğan həbs olunub.

Araşdırmalar zamanı hadisənin yalnız məişət zorakılığı ilə məhdudlaşmadığı ortaya çıxıb. Təhlükəsizlik kameralarının görüntüləri və şahid ifadələri araşdırılarkən evə tez-tez gedib-gəldiyi deyilən Kadir adlı taksi sürücüsü diqqət mərkəzinə düşüb.

İfadə verən taksi sürücüsü qadın hakimə mütəmadi olaraq müxtəlif həblər çatdırdığını və həmin preparatları başqa şəhərdən əldə etdiyini iddia edib.
Bu açıqlamalardan sonra istintaqın istiqaməti dəyişib. Qadın hakim isə sözügedən dərmanların “yaşıl reseptli” preparatlar olduğunu etiraf edib.

İstintaqın obyektiv aparılması məqsədilə hakim üç ay müddətinə vəzifəsindən uzaqlaşdırılıb. Bildirilir ki, qərarı öyrənən qadın işlədiyi məhkəmə binasına gələrək ətrafındakı şəxslərə qarşı təhqir və təhdidlər səsləndirib.

Daha sonra təhlükəsizlik əməkdaşları və məhkəmə personalı tərəfindən binadan uzaqlaşdırılıb.

Hazırda həm zorakılıq hadisəsi, həm də sonradan ortaya çıxan qanun pozuntusu iddiaları ilə bağlı çoxşaxəli məhkəmə və inzibati araşdırmalar davam etdirilir.