ABŞ-nin Aydaho ştatında yerləşən “Mauntin-Houm” Hərbi Hava Qüvvələri bazasında keçirilən “Gunfighters Skies” aviaşousu zamanı ciddi qəza baş verib.

Məlumata görə, Mountain Home Air Force Base üzərində uçuş nümayişi həyata keçirən iki hərbi təyyarə havada toqquşub. Hadisəyə EA-18G Growler tipli elektron döyüş təyyarələrinin cəlb olunduğu bildirilir.

İlkin məlumatlara əsasən, toqquşma anında hər iki təyyarənin ekipaj üzvləri katapult sistemini işə sala bilib və təhlükəsiz şəkildə təyyarəni tərk ediblər. Rəsmi qurumlar onların vəziyyəti barədə hələlik əlavə məlumat açıqlamayıb.

Qəza baş verəndən sonra hərbi hava bazasında bütün uçuşlar dayandırılıb, əraziyə təcili yardım və hərbi-xilasetmə qrupları cəlb olunub. Hadisənin səbəbləri hazırda araşdırılır.

Rəsmilər toqquşmanın necə baş verdiyi və texniki və ya insan faktoru olub-olmaması ilə bağlı hələlik açıqlama verməyiblər.