Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva Masallı rayonuna səfəri çərçivəsində Musaküçə kəndində həsirçiliklə məşğul olan qadınlarla görüşüb.
Qanuntv.az xəbər verir ki, görüş zamanı Leyla Əliyeva ölkəmizdə ənənəvi həsir toxuculuğu sənətini yaşadan “Rooted Hands” layihəsinin iştirakçıları ilə söhbət edib, onların əl işləri və yaradıcılıq fəaliyyəti ilə tanış olub.
Bildirilib ki, Musaküçə kəndindən olan qadınlar təbii qamış bitkilərini toplayaraq qurudur və nəsildən-nəslə ötürülən ənənəvi üsullarla əl işi həsirlər toxuyurlar. Bu sənət həm mədəni irsin qorunması, həm də qadınların məşğulluğu və iqtisadi dayanıqlığının dəstəklənməsi baxımından mühüm əhəmiyyət daşıyır.
Səmimi görüş zamanı qadınlar həsir toxuma prosesini nümayiş etdiriblər. Leyla Əliyeva da onlarla birlikdə həsir toxuyaraq qədim sənətin incəlikləri ilə yaxından maraqlanıb. Daha sonra “Rooted Hands” layihəsinə həsr olunmuş qısa film nümayiş olunub.
Leyla Əliyevanın dəstəyi ilə qadınlar üçün yenilənmiş məkan yaradılıb. Məkan onların işləməsi, təlim və ustad dərsləri keçməsi, eləcə də əl işlərini nümayiş etdirərək satışını həyata keçirməsi üçün nəzərdə tutulub.
Qeyd edək ki, “Rooted Hands” layihəsi artıq beynəlxalq səviyyədə də tanıdılır. Layihə 2025-ci ildə Milan Moda Həftəsində təqdim olunaraq Azərbaycanın təbii materialları, qadın sənətkarların əl əməyi və ənənəvi sənətkarlığın müasir dizaynla vəhdətini nümayiş etdirib.
