İranın İslam İnqilabı Keşikçiləri Korpusu (SEPAH) Hərbi Dəniz Qüvvələri ABŞ və İsrailə məxsus olduğu bildirilən "MSC Sariska" adlı gəmiyə qanadlı raketlə zərbə endirdiyini bəyan edib.

QanunTV.az xəbər verir ki, bu barədə İranın Dövlət Teleradio Şirkəti məlumat yayıb.

SEPAH-ın açıqlamasında bildirilib ki, əməliyyat ABŞ ordusunun Oman körfəzində İrana məxsus "Lian Star" gəmisinə qarşı həyata keçirdiyi hücuma cavab olaraq təşkil olunub.

Bəyanatda qeyd olunub: "ABŞ ordusunun Oman körfəzi bölgəsində İrana məxsus "Lian Star" gəmisinə qarşı təcavüzkar hücumunun ardınca İslam İnqilabı Keşikçiləri Korpusunun Hərbi Dəniz Qüvvələri cavab əməliyyatı çərçivəsində düşmən ABŞ-İsrailə məxsus "MSC Sariska" gəmisinə qanadlı raketlə zərbə endirib".

Xatırladaq ki, mayın 30-da ABŞ Silahlı Qüvvələrinin Mərkəzi Komandanlığı İran limanına doğru hərəkət edən "Lian Star" quru yük gəmisinin "Hellfire" raketi ilə vurulduğunu açıqlamışdı.

Hazırda hadisə ilə bağlı müstəqil mənbələr tərəfindən təsdiqlənmiş əlavə məlumat yayılmayıb.