ABŞ-nin Türkiyəyə qarşı müdafiə sənayesi sahəsində tətbiq etdiyi məhdudiyyətlərin və sanksiyaların aradan qaldırılması Ankara ilə Vaşinqton arasında münasibətlərin yenidən normallaşması baxımından mühüm addım kimi qiymətləndirilir.

Türkiyəli politoloq İsmail Cingöz bildirib ki, belə bir qərar yalnız Türkiyənin ehtiyac duyduğu hərbi texnologiyalara çıxışını asanlaşdırmayacaq, eyni zamanda NATO-nun cənub cinahının gücləndirilməsinə və alyansın çəkindiricilik potensialının artırılmasına da töhfə verəcək.

Ekspertin sözlərinə görə, müasir döyüş təyyarələri, mühərrik texnologiyaları, elektron müharibə sistemləri və müxtəlif müdafiə avadanlıqlarına çıxışın genişlənməsi Türkiyə Silahlı Qüvvələrinin modernləşmə prosesini sürətləndirə bilər. Bununla yanaşı, müdafiə sənayesi sahəsində birgə istehsal, texnologiya transferi və sənaye əməkdaşlığının yenidən canlanması üçün də əlverişli zəmin yarana bilər.

Analitik vurğulayıb ki, son illərdə Türkiyənin milli müdafiə sənayesində əldə etdiyi mühüm nailiyyətlər Ankaranın artıq tam şəkildə xarici asılılığa əsaslanan siyasət yürütməyəcəyini göstərir. Bu səbəbdən Türkiyənin hər hansı müdafiə sazişini qarşılıqlı maraqlar, suveren bərabərlik və "qazan-qazan" prinsipi çərçivəsində qiymətləndirəcəyi gözlənilir.

İsmail Cingöz qeyd edib ki, Vaşinqton üçün də bu proses yalnız iqtisadi və ya kommersiya xarakteri daşımır, həm də mühüm strateji əhəmiyyət kəsb edir. ABŞ Türkiyənin NATO daxilində rolunun daha da güclənməsini, Qara dəniz, Yaxın Şərq və Şərqi Aralıq dənizi regionlarında Qərblə daha sıx koordinasiya şəraitində fəaliyyət göstərməsini arzulayır.

Ekspert hesab edir ki, ABŞ-nin müdafiə sahəsində tətbiq etdiyi sanksiyaları ləğv etməsi Türkiyə-ABŞ münasibətlərində yeni mərhələnin başlanğıcı ola bilər. Bununla belə, bu prosesin uzunmüddətli və dayanıqlı nəticələr verməsi tərəflərin bir-birinin təhlükəsizlik həssaslıqlarını nəzərə alan, qarşılıqlı etimada söykənən və strateji tərəfdaşlığı yenidən formalaşdıran yanaşma nümayiş etdirməsindən asılı olacaq.