Bu gündən “Xüsusi icra məmurları haqqında” qanun qüvvəyə minir. Qanun xüsusi icra məmurlarının fəaliyyətinin təşkili və onlara nəzarəti, həmçinin hüquqi statusunu tənzimləyir.
Xüsusi icra məmuru məhkəmələrin və qanunla icrası icra məmurlarına həvalə edilmiş digər orqanların sənədlərinin icrasını həyata keçirmək üçün xüsusi icra məmuru şəhadətnaməsi almış fiziki şəxsdir. O, məcburi icra orqanı statusuna malik olacaq və fəaliyyətini peşəkar əsaslarla həyata keçirəcək. Qanuna əsasən, xüsusi icra məmuru dövlət hakimiyyətinin nümayəndəsi hesab olunmur və onun fəaliyyəti sahibkarlıq fəaliyyəti sayılmır.
Xüsusi icra məmurunun icra icraatı çərçivəsində qəbul etdiyi qərarlar hüquqi qüvvəsinə görə dövlət icra məmurunun qəbul etdiyi qərarlara bərabərdir.
Həmçinin, Xüsusi İcra Məmurlarının Müsabiqə və İntizam komissiyaları 3 üzvü Ədliyyə Nazirliyi, 3 üzvü Xüsusi İcra Məmurlarının Palatası, 1 üzvü Notariat Palatası tərəfindən təyin edilmiş nümayəndələrdən, 1 hakim Məhkəmə-Hüquq Şurası tərəfindən, 1 vəkil isə Vəkillər Kollegiyası tərəfindən təyin edilmiş şəxsdən ibarət olacaq. Komissiyalarda ümumilikdə iki məhkəmə hakimi iştirak edir.