Fevralın 3-də Heydər Əliyev Fondunun vitse-prezidenti Leyla Əliyeva Birləşmiş Ərəb Əmirliklərinin Əbu-Dabi şəhərində yerləşən Zayed Milli Muzeyində keçirilən “İnsan Qardaşlığı Məclisi” (“Human Fraternity Majlis”) adlı tədbirdə iştirak edib.
QanunTV.az xəbər verir ki, tədbir BƏƏ-nin tolerantlıq naziri Şeyx Nəhyan Mübarək Al Nəhyanın videomüraciəti ilə başlayıb.
Daha sonra Müsəlman Ağsaqqalları Şurasının baş katibi Məhəmməd Əbdülsalam, Özbəkistan Respublikası Prezidenti Administrasiyasının rəhbəri Saida Mirziyoyeva çıxış ediblər. Kardinal Corc Koovakad Papa XIV Leonun tədbir iştirakçılarına ünvanladığı məktubu oxuyub.
Tədbir çərçivəsində “Zayed İnsan Qardaşlığı Mükafatı”na həsr olunmuş videoçarx nümayiş etdirilib.
“Qadın liderliyi insan qardaşlığının təməlidir” mövzusunda keçirilən panel sessiyada İndoneziyanın sabiq Prezidenti Meqavati Sukarnoputri, Livanın birinci xanımı Nehmat Aoun, Kolumbiyanın birinci xanımı Veronika Alkoser Qarsiya və digər nüfuzlu şəxslər çıxış ediblər.
Panel sessiyada çıxış edən Leyla Əliyeva Azərbaycanda müxtəlif mədəniyyətlərə, dinlərə və ənənələrə hörmətin tarixən həyat tərzinin ayrılmaz hissəsi olduğunu bildirib. O, uşaqların mehriban mühitdə və ali ailə dəyərləri əsasında böyüdüklərini vurğulayaraq bunun onların gələcəkdə güclü şəxsiyyət kimi formalaşmasına mühüm təsir göstərdiyini qeyd edib.
Leyla Əliyeva Heydər Əliyev Fondunun fəaliyyəti barədə danışaraq, fond tərəfindən təkcə Azərbaycanda deyil, Pakistan, Gürcüstan, Bosniya və Herseqovinada da bir çox məktəblərin inşa edildiyini və ya əsaslı təmir olunduğunu diqqətə çatdırıb. O, həmçinin yeni texnologiyaların inkişafı fonunda təhsil sisteminin dəyişməsinin vacibliyini vurğulayıb və bu prosesin artıq başladığını bildirib.
Valideyn və müəllimlərin uşaqlara daha çox diqqət və hörmət göstərməsinin vacibliyini qeyd edən Leyla Əliyeva onların dinlənilməsinin və dəyərləndirilməsinin önəmini xüsusi vurğulayıb.
Uşaqların sosial medianın mənfi təsirlərindən qorunmasına da toxunan Leyla Əliyeva hazırda Azərbaycanda beynəlxalq təcrübəyə əsaslanaraq yetkinlik yaşına çatmayanların zərərli məlumatlardan qorunması istiqamətində araşdırmalar aparıldığını bildirib.
Tədbirdə, həmçinin Pakistanın birinci xanımı Aseefa Bhutto Zardari də çıxış edib
