21 fevral bütün dünyada Beynəlxalq Ana Dili Günü kimi qeyd olunur. Bu əlamətdar gün 1999-cu ilin noyabrında Banqladeş səfirinin təşəbbüsü ilə UNESCO tərəfindən təsis edilib.
Beynəlxalq Ana Dili Günü 1952-ci il fevralın 21-də Banqladeşin Benqal bölgəsində ana dilinin rəsmi dil statusu alması uğrunda keçirilən aksiyalar zamanı 4 tələbənin qətlə yetirilməsi hadisəsinin xatirəsinə həsr olunub. Bu gün dünyada dil müxtəlifliyinin qorunması və inkişaf etdirilməsi ideyasını təbliğ edir.
Dil hər bir xalqın maddi və mənəvi irsini yaşadan, milli kimliyini qoruyan ən mühüm vasitədir. Ana dili insanın dünyagörüşünün formalaşmasında, təhsilində, mənəvi zənginliyində və cəmiyyətlə ünsiyyətində əvəzsiz rol oynayır. Eyni zamanda, dil millətin özünəməxsusluğunu qorumaqla yanaşı, başqa xalqların mədəni irsi ilə tanış olmağa və beynəlxalq əlaqələrin genişlənməsinə imkan yaradır.
Milli dövlətçilik tarixində dilin dövlət dili statusuna yüksəlməsi xüsusi əhəmiyyət daşıyır. Bu, millətin öz taleyinə sahib çıxmasının, müstəqil dövlət qurmaq və onu qorumaq qüdrətinin göstəricisidir. Azərbaycan dili də bu şərəfli tarixi mərhələni yaşamışdır.
Ölkəmizdə ana dilinin qorunması və inkişafı ümummilli lider Heydər Əliyevin məqsədyönlü siyasətinin nəticəsi olaraq mühüm mərhələyə qədəm qoyub. 2002-ci il sentyabrın 30-da “Azərbaycan Respublikasında dövlət dili haqqında” Qanunun qəbul edilməsi Azərbaycan dilinin tətbiqi, qorunması və inkişaf etdirilməsi istiqamətində mühüm addım olub.
Bu siyasət hazırda Prezident İlham Əliyev tərəfindən uğurla davam etdirilir. Dövlət başçısının “Azərbaycan dilində latın qrafikası ilə kütləvi nəşrlərin həyata keçirilməsi haqqında” 12 yanvar 2004-cü il tarixli Sərəncamı və həyata keçirilən digər tədbirlər dilimizin inkişafına göstərilən diqqət və qayğının bariz nümunəsidir.
Ana dilimizi qorumaq, onu zənginləşdirmək və gələcək nəsillərə çatdırmaq hər bir azərbaycanlının müqəddəs borcudur.
