Azərbaycanda müəllimlərin hər üç ildən bir keçirilən sertifikasiya imtahanı ilə bağlı maraqlı məqam gündəmə gəlib. Bəzi müəllimlərin bu imtahandan yayınmaq üçün işdən çıxaraq yenidən MİQ imtahanında iştirak etməsi suallar doğurur.



Məsələ ilə bağlı təhsil eksperti Elçin Əfəndi açıqlama verib. Onun sözlərinə görə, müəllim əmək müqaviləsinə xitam verdikdən sonra yenidən müəllimlərin işə qəbulu imtahanında (MİQ) iştirak edə bilər.

Ekspert bildirib ki, sertifikasiya və MİQ imtahanları tamamilə fərqli məqsədlərə xidmət edir: MİQ müəllimlərin işə qəbulu üçün keçirilir, sertifikasiya isə artıq fəaliyyət göstərən müəllimlərin bilik və bacarıqlarının qiymətləndirilməsinə yönəlib.

Onun sözlərinə görə, bəzi müəllimlər sertifikasiyadan yayınmaq üçün bu yola əl atsalar da, bu məsələ Elm və Təhsil Nazirliyi tərəfindən diqqətdə saxlanılır. Hüquqi baxımdan isə müəllimlərin bu imkandan istifadə etməsində məhdudiyyət yoxdur.

Bununla belə, ekspert vurğulayıb ki, sertifikasiya nəticələri müəllimlərin əməkhaqqına birbaşa təsir edir. Belə ki, yüksək nəticə göstərən müəllimlərə əlavə faiz artımı tətbiq olunur: 51 və daha yüksək bal toplayanlara 35%, 31 və daha yüksək bal toplayanlara isə 10% maaş artımı verilir. Sertifikasiyada iştirak etməyən müəllimlər isə bu üstünlüklərdən yararlana bilmirlər.

Eyni zamanda qeyd olunub ki, sertifikasiyadan keçmiş müəllimlərin sonradan yenidən MİQ imtahanında iştirak etməsinə də heç bir məhdudiyyət yoxdur.
Ekspert müəllimlərə tövsiyə edib ki, sertifikasiya vaxtı çatdıqda imtahanda mütləq iştirak etsinlər. Bu, həm peşəkar inkişaf, həm də əlavə maddi üstünlüklər baxımından vacib hesab olunur.