Azərbaycan Respublikasının Prezidenti Ilham Əliyev, birinci xanım Mehriban Əliyeva və ailə üzvləri mayın 1-də Bakı şəhərinin Səbail və Yasamal rayonlarını əhatə edən İslam Səfərli küçəsinin yenidənqurmadan sonra açılışında iştirak ediblər.
Qanuntv.az xəbər verir ki, bu barədə AZƏRTAC məlumat yayıb.
Bakı Şəhər İcra Hakimiyyətinin başçısı Eldar Əzizov dövlət başçısına və birinci xanıma görülmüş işlər barədə məlumat verib.
Bildirilib ki, Azərbaycan prospektindən başlayaraq Nigar Rəfibəyli küçəsinin bir hissəsi də daxil olmaqla, İslam Səfərli küçəsi boyunca Mirzəağa Əliyev küçəsinədək olan ərazi tam şəkildə abadlaşdırılıb. Bu ərazidən Mərkəzi Parka piyadaların rahat hərəkəti üçün keçid təmin olunub.
İslam Səfərli küçəsi ilə kəsişən 8 küçədə, eyni zamanda Təbriz Xəlilbəyli və Mirzə İbrahimov küçələrinə qədər olan hissədə də abadlıq işləri aparılıb. Abadlaşdırılan küçələrin ümumi uzunluğu 1350 metr təşkil edir.
Bu küçələrdə su və çirkab sularının axıdılması xətləri tamamilə yenilənib, qaz xətləri isə yeraltı sistemlə əvəz olunub. Eyni zamanda müxtəlif təyinatlı binalarda yenidənqurma və bərpa işləri görülüb, sakinlərin və şəhər qonaqlarının istirahəti üçün oturacaqlar quraşdırılıb, geniş yaşıllaşdırma işləri həyata keçirilib.
Layihənin icrası piyadalar üçün Fəvvarələr meydanından birbaşa Qış parkına çıxış imkanı yaradır. Ərazidə XIX əsrin sonu – XX əsrin əvvəllərində inşa edilmiş yerli əhəmiyyətli memarlıq abidələri də mövcuddur ki, bu da məkanın cəlbediciliyini daha da artırır.
Avtomobil yollarının piyada yolları ilə əvəzlənməsi burada fəaliyyət göstərən mağaza, kafe və restoranların işinə müsbət təsir göstərəcək, həmçinin kiçik bizneslər üçün yeni imkanlar yaradacaq.
Qeyd edək ki, paytaxt Bakıda müasir şəhərsalma tendensiyalarına uyğun həyata keçirilən bu cür layihələr həm sakinlərin, həm də turistlərin rahatlığına xidmət edir və şəhərin davamlı inkişaf strategiyasının mühüm hissəsini təşkil edir.
