Azərbaycanın xarici işlər naziri Ceyhun Bayramov ilə Avropa Komissiyasının vitse-prezidenti, Aİ-nin ali nümayəndəsi Kaya Kallas arasında geniştərkibli görüş baş tutub.
Bu barədə Azərbaycan Xarici İşlər Nazirliyi məlumat yayıb.
Görüş zamanı tərəflər Azərbaycan ilə Avropa İttifaqı arasında münasibətlərin bütün istiqamətlərini əhatə edən geniş müzakirələr aparıblar. Siyasi dialoq, hüquqi və institusional əməkdaşlıq, eləcə də tərəfdaşlığın gələcək inkişaf perspektivləri nəzərdən keçirilib.
Müzakirələrdə enerji sahəsi xüsusi yer tutub.
Azərbaycanın Avropanın enerji təhlükəsizliyində etibarlı tərəfdaş kimi rolu vurğulanıb, həmçinin bərpa olunan enerji üzrə əməkdaşlıq imkanları dəyərləndirilib.
Bununla yanaşı, ticarət və investisiyalar, iqtisadiyyatın şaxələndirilməsi, rəqəmsallaşma, innovasiya və sənaye sahələrində əməkdaşlıq, eləcə də nəqliyyat və logistika əlaqələri müzakirə olunub. Xüsusilə Orta Dəhlizin inkişafı və regional infrastruktur layihələri diqqət mərkəzində olub.
Tərəflər regional və beynəlxalq təhlükəsizlik məsələlərinə də toxunaraq, post-münaqişə dövründə vəziyyət, yenidənqurma və bərpa işləri, humanitar minatəmizləmə fəaliyyəti və Cənubi Qafqazda normallaşma prosesini müzakirə ediblər.
Görüşdə dayanıqlı sülh və sabitliyin təmin olunmasının vacibliyi vurğulanıb.
Qeyd edilib ki, Kaya Kallasın Azərbaycana səfəri dəyişən regional və qlobal şəraitdə Azərbaycan–Aİ dialoqunun əhəmiyyətini bir daha önə çıxarır və qarşılıqlı maraqlara əsaslanan əməkdaşlığın genişləndirilməsi üçün yeni imkanlar yaradır.
