Bakıda keçirilən “Müasir Kənd Təsərrüfatı Əməkdaşlığı Davamlı İnkişafın Təməli və Ərzaq Təhlükəsizliyinin Qarantı Kimi” adlı konfransda kənd təsərrüfatının mövcud vəziyyəti və çağırışları müzakirə olunub.
Qanuntv.az xəbər verir ki, tədbirdə çıxış edən kənd təsərrüfatı naziri Məcnun Məmmədov bildirib ki, hazırda kənd təsərrüfatı Azərbaycanın ümumi daxili məhsulunun (ÜDM) təxminən 5–6 faizini təşkil edir.
Nazirin sözlərinə görə, ölkədə məşğulluğun 25 faizdən çoxu məhz kənd təsərrüfatı sektorunun payına düşür. O vurğulayıb ki, bu sahə həm iqtisadi, həm də sosial baxımdan mühüm əhəmiyyət daşıyır və buna uyğun dövlət siyasəti formalaşdırılmalıdır.
Məcnun Məmmədov əlavə edib ki, kənd təsərrüfatı sektorunda iqlim dəyişiklikləri, regional təhlükəsizlik problemləri və su ehtiyatlarının azalması kimi ciddi çağırışlar mövcuddur.
Onun sözlərinə görə, hazırda su qıtlığı probleminin həlli üçün genişmiqyaslı layihələr həyata keçirilir. Bu çərçivədə su anbarlarının tikintisi, su toplama sistemlərinin yaradılması və mövcud infrastrukturun modernləşdirilməsi istiqamətində işlər aparılır.
Nazir həmçinin qeyd edib ki, suyun idarə olunmasının təkmilləşdirilməsi üçün açıq torpaq kanallarından beton və qapalı boru sistemlərinə keçid əsas prioritetlərdəndir.
