Azərbaycan Prezidenti İlham Əliyev İtaliya Prezidenti Sercio Mattarellaya İtaliya Respublikasının yaranmasının 80-ci ildönümü münasibətilə təbrik məktubu ünvanlayıb.

QanunTV.az xəbər verir ki, dövlət başçısı məktubunda İtaliyanın Azərbaycanın yaxın dostu və etibarlı strateji tərəfdaşı olduğunu vurğulayıb.

Prezident İlham Əliyev qeyd edib ki, ölkələr arasında münasibətlər qarşılıqlı hörmət və etimad ruhunda inkişaf edir, çoxşaxəli strateji tərəfdaşlıq isə gündən-günə genişlənərək yeni məzmun qazanır.

Məktubda ötən ilin oktyabr ayında Sercio Mattarellanın Azərbaycana ikinci rəsmi səfərinin dövlətlərarası əlaqələrin və siyasi dialoqun yüksək səviyyəsinin göstəricisi olduğu bildirilib. Həmçinin səfər çərçivəsində İtaliya-Azərbaycan Universitetinin açılışında birgə iştirakın mədəni-humanitar əməkdaşlığın inkişafına verilən önəmin təzahürü olduğu vurğulanıb.

Dövlət başçısı Azərbaycan ilə İtaliya arasında iqtisadiyyat, ticarət, enerji, sənaye, təhsil və digər sahələrdə əməkdaşlığın strateji xarakter daşıdığını qeyd edib. O, mövcud potensialın tam reallaşdırılması, investisiya, müdafiə və humanitar sahələrdə əməkdaşlığın daha da genişləndirilməsinin vacibliyini diqqətə çatdırıb.

Sonda Prezident İlham Əliyev italiyalı həmkarına möhkəm cansağlığı, fəaliyyətində uğurlar, İtaliya xalqına isə firavanlıq və rifah arzulayıb.