Milli Məclisin Xarici müdaxilələrə və hibrid təhdidlərə qarşı müvəqqəti komissiyası CNN telekanalında yayımlanan məqalədə Azərbaycanla bağlı səsləndirilən iddialara münasibət bildirib.

Komissiyanın yaydığı bəyanatda qeyd olunub ki, CNN-də dərc edilən və anonim mənbələrə istinad edilən materialda Azərbaycana qarşı əsassız ittihamlar irəli sürülüb. Bildirilib ki, sözügedən məlumatlar ölkənin milli maraqlarına və beynəlxalq nüfuzuna zərər vurmağa yönəlmiş dezinformasiya kampaniyasının tərkib hissəsi kimi qiymətləndirilir.

Bəyanata görə, aparılan monitorinqlər nəticəsində məqalənin dərcindən sonra məlumatın müxtəlif beynəlxalq media qurumları və sosial şəbəkələr vasitəsilə sürətlə yayılması müşahidə olunub.

Komissiya vurğulayıb ki, Azərbaycanın ərazisində heç bir xarici dövlətin hərbi bazası və ya qoşunları mövcud deyil. Həmçinin ölkə ərazisindən üçüncü dövlətlərə qarşı hər hansı qeyri-dost fəaliyyətlərin həyata keçirilməsinin mümkün olmadığı bildirilib.

Sənəddə CNN rəhbərliyinə müraciət edilərək məqalədə yer alan iddiaların sübut olunması və ya həmin məlumatların əsassızlığı ilə bağlı ictimaiyyət qarşısında açıqlama verilməsi tələb olunub.

Komissiya hesab edir ki, əks halda, anonim və təsdiqlənməmiş mənbələrə əsaslanan bu cür materialların yayılması informasiya manipulyasiyası və dezinformasiya kampaniyalarının tərkib hissəsi kimi dəyərləndirilə bilər.