Ermənistanda parlament seçkiləri üzrə səsvermə prosesinə start verilib.
Qanuntv.az xəbər verir ki, bu barədə TASS agentliyi məlumat yayıb.
Məlumata görə, yerli vaxtla saat 08:00-da ölkə üzrə 2 500 seçki məntəqəsi fəaliyyətə başlayıb. Səsvermə Bakı vaxtı ilə də eyni saatda başlayıb.
Seçkilərdə iştirak etmək üçün 16 siyasi partiya və 2 seçki bloku qeydiyyatdan keçib. Rəsmi məlumatlara əsasən, təxminən 2,5 milyon vətəndaş səsvermə hüququna malikdir.
Qeyd olunur ki, yeni seçki məcəlləsinə əsasən seçici fəallığı üçün minimum hədd müəyyən edilmədiyindən, iştirak səviyyəsindən asılı olmayaraq seçkilər baş tutmuş hesab ediləcək.
Seçki məntəqələri yerli vaxtla saat 20:00-da bağlanacaq. Ermənistan Mərkəzi Seçki Komissiyasının ilkin nəticələri növbəti gün açıqlayacağı, yekun nəticələrin isə ən geci yeddi gün ərzində elan ediləcəyi bildirilib.
