Dövlət İmtahan Mərkəzi (DİM) bu gün ümumi (9 illik) orta təhsil səviyyəsi üzrə müxtəlif növ imtahanlar (təkrar) keçirəcək.

Qanuntv.az xəbər verir ki, imtahanlar Bakı, Abşeron və Sumqayıtda təşkil olunacaq.

Təkrar imtahanda mayın 25-27-də qeydiyyatdan keçən və 9 illik təhsil bazasında kolleclərin müsabiqəsində iştirak etmək istəyən abituriyentlər iştirak edəcəklər. Həmçinin qeyd olunan ərazilərdə mayın 25-26-da təhsil aldıqları məktəbə müraciət edən IX sinif şagirdləri də imtahana buraxılacaq.

İmtahan saat 10:00-da başlayacaq. İştirakçıların imtahan binasına buraxılışı isə saat 09:45-də başa çatacaq. Bu vaxtdan sonra gələn şəxslər imtahan binasına buraxılmayacaq.

DİM iştirakçılara imtahana buraxılış vərəqəsi və şəxsiyyəti təsdiq edən sənədin əslini gətirməyin vacib olduğunu xatırladıb.

İmtahanlarda ümumilikdə 365 nəfərin iştirakı nəzərdə tutulur. Onlardan 6 nəfəri sağlamlıq imkanları məhdud şagirddir. Bu iştirakçıların rahat imtahan verməsi üçün xüsusi zallar ayrılıb və zəruri hallarda fərdi nəzarətçilər təyin olunub.

İmtahanların təşkili üçün 3 ümumi imtahan rəhbəri, 6 imtahan rəhbəri, 41 nəzarətçi, 6 buraxılış rejimi əməkdaşı və 3 bina nümayəndəsi cəlb olunub.