Aşura günü münasibətilə Azərbaycanda keçirilən qanvermə aksiyasında iştirak edən donorların sayı 2 534 nəfərə çatıb.

Səhiyyə Nazirliyinin məlumatına görə, iyunun 24-ü saat 14:00-a olan məlumata əsasən, aksiya zamanı ümumilikdə 1 140,3 litr qan toplanıb.

Qeyd edək ki, saat 12:00-a olan ilkin göstəricilərə əsasən 1 701 nəfər könüllü donor qan verib, nəticədə 765,45 litr qan toplanıb.

Qafqaz Müsəlmanları İdarəsi sədri, şeyxülislam Hacı Allahşükür Paşazadənin təşəbbüsü ilə keçirilən aksiyada Azərbaycandakı dini konfessiyaların rəhbərləri və nümayəndələri də iştirak ediblər. Onlar bu təşəbbüsün həmrəylik, humanizm və mərhəmət dəyərlərinin təbliği baxımından mühüm əhəmiyyət daşıdığını bildiriblər.

Bu il qanvermə aksiyası ölkənin 30 şəhər və rayonunda yerləşən 40 məntəqədə təşkil olunub.

Qanvermə aksiyasının keçirildiyi ünvanlar:

Xəzər rayonu – Mirmövsüm Ağa Ziyarətgahı
Nəsimi rayonu – Əjdərbəy məscidi (Göy məscid)
Nizami rayonu – Sahib-əz-Zaman məscidi, Şah Abbas məscidi
Səbail rayonu – Bibiheybət məscid ziyarətgahı
Sabunçu rayonu – İmam-Rza məscidi
Suraxanı rayonu – Qaraçuxur məscidi
Yasamal rayonu – Təzəpir məscidi, İlahiyyat İnstitutu
Binəqədi rayonu – Came məscidi, İmam Əli məscidi

Gəncə şəhəri – İmamzadə məscid ziyarətgah kompleksi
Lənkəran şəhəri – Mərkəzi Qan Bankının Lənkəran bölməsi
Mingəçevir şəhəri – Heydər məscidi
Sumqayıt şəhəri – Cümə məscidi
Şəki şəhəri – İmam Əli məscidi
Şirvan şəhəri – Şirvan şəhər məscidi
Bərdə rayonu – İmamzadə ziyarətgah məscidi
Quba rayonu – Mərkəzi Qan Bankının Quba bölməsi
Masallı rayonu – Cümə məscidi, Boradigah qəsəbə xəstəxanası
Göyçay rayonu – Əbülfəzlil Abbas məscidi
Xaçmaz rayonu – Rayon Mərkəzi Xəstəxanası
Salyan rayonu – Hacı Tağı məscidi

Şuşa şəhəri – Yuxarı Gövhər ağa məscidi
Ağdam şəhəri – Ağdam şəhər Cümə məscidi
Naxçıvan şəhəri – Heydər məscidi, Sarvanlar məscidi, Pirqəmiş məscidi
Babək rayonu – Mərkəzi Rayon Xəstəxanası, Qahab, Cəhri və Nehrəm kənd həkim məntəqələri
Ordubad rayonu – Rayon Mərkəzi Xəstəxanası
Culfa rayonu – Rayon Mərkəzi Xəstəxanası, Bənəniyar kənd həkim məntəqəsi
Şahbuz rayonu – Rayon Mərkəzi Xəstəxanası
Kəngərli rayonu – Rayon Mərkəzi Xəstəxanası
Sədərək rayonu – Rayon Mərkəzi Xəstəxanası
Şərur rayonu – Rayon Mərkəzi Xəstəxanası

Toplanan qan hemofiliya, talassemiya və digər xəstəliklərdən əziyyət çəkən insanların müalicəsində istifadə olunacaq.