Azərbaycan Prezidenti İlham Əliyev Birinci Türkoloji Qurultayın 100 illik yubileyinə həsr olunmuş Türk Dünyası Həftəsinin iştirakçılarına müraciət ünvanlayıb.

QanunTV.az xəbər verir ki, müraciət mətnini Azərbaycan Prezidentinin Administrasiyasının Humanitar siyasət məsələləri şöbəsinin müdiri Fərəh Əliyeva oxuyub.

Prezident müraciətində Türk Dünyası Həftəsinin keçirilməsini mühüm hadisə kimi qiymətləndirib və bildirib ki, Birinci Türkoloji Qurultayın 100 illik yubileyinin qeyd olunması Azərbaycan sədrliyi dövrünə təsadüf etdiyi üçün xüsusi rəmzi məna daşıyır.

Dövlət başçısı qeyd edib ki, 1926-cı ildə Bakıda keçirilən Birinci Türkoloji Qurultay türk xalqlarının mədəni inteqrasiyası, dil, tarix, ədəbiyyat və mədəniyyət sahəsində əməkdaşlığın inkişafı baxımından böyük əhəmiyyətə malik olub.

Müraciətdə vurğulanıb ki, həmin dövrdə Azərbaycanın ictimai-siyasi və mədəni mühiti, milli mətbuatın, teatrın və təhsil ocaqlarının yaranması ölkədə milli özünüdərkin formalaşmasına mühüm təsir göstərib.

Prezident İlham Əliyev Birinci Türkoloji Qurultayın iştirakçılarının 1930-cu illərdə repressiyalara məruz qalmasını da xatırladaraq onların xatirəsinin ehtiramla yad edildiyini bildirib.

Dövlət başçısı qeyd edib ki, Türk Dövlətləri Təşkilatının müasir dövrdə həyata keçirdiyi humanitar layihələrin əsasını vaxtilə qurultayda səsləndirilən ideyalar təşkil edir.

Müraciətdə həmçinin bildirilib ki, türk dünyası böyük bir sivilizasiyanın davamçısı olaraq beynəlxalq arenada mühüm güc mərkəzlərindən birinə çevrilmək yolundadır.

Prezident əminliyini ifadə edib ki, Türk Dünyası Həftəsi keçirilən tədbirlərlə tarixi-mənəvi irsin qorunmasına, öyrənilməsinə və təbliğinə mühüm töhfə verəcək.