Bu gün Dövlət İmtahan Mərkəzi (DİM) tərəfindən II və III ixtisas qrupları üzrə ali təhsil müəssisələrinə qəbul imtahanı keçirilib.

Qanuntv.az xəbər verir ki, DİM-in yaydığı məlumata əsasən, imtahanlar Bakı, Xankəndi, Naxçıvan, Gəncə, Şəmkir, Ağstafa, Qazax, Sumqayıt, Abşeron, Şamaxı, Mingəçevir, Şəki, Zaqatala, Bərdə, Göyçay, Ucar, Kürdəmir, Şirvan, Sabirabad, Salyan, Lənkəran, Cəlilabad, Masallı, Quba və Xaçmaz şəhər və rayonlarında təşkil olunub.

İmtahan prosesinin idarə olunması üçün DİM-də operativ qərargah fəaliyyət göstərib, imtahanların gedişi mütəmadi olaraq nəzarətdə saxlanılıb. Bütün imtahan binalarında proses təlimata uyğun şəkildə keçirilib və iştirakçılar üçün zəruri şərait yaradılıb.

Ümumilikdə 172 imtahan binası və 3 074 imtahan zalı ayrılıb. İmtahanların təşkilinə 172 ümumi imtahan rəhbəri, 491 imtahan rəhbəri, 3 808 nəzarətçi, 554 buraxılış rejimi əməkdaşı və 172 bina nümayəndəsi cəlb olunub.

İlkin məlumatlara əsasən, üzərində mobil telefon aşkar edilən 11 nəfər imtahandan xaric olunub. Qayda pozuntusuna yol verən şəxslərin müsabiqə nəticələri ləğv edilir və onlar ixtisas seçiminə buraxılmırlar.

İmtahanda ümumilikdə 41 622 abituriyentin iştirakı nəzərdə tutulub. Onlardan 67 nəfəri sağlamlıq imkanları məhdud şəxslər olub. Bu kateqoriyadan olan abituriyentlərin rahat şəkildə imtahan vermələri üçün xüsusi zallar ayrılıb, zəruri şərait yaradılıb və ehtiyac olan hallarda fərdi nəzarətçilər təyin edilib.

DİM bildirib ki, iyulun 6-dan etibarən imtahan protokollarının və materiallarının emalına başlanılacaq. Açıq tipli tapşırıqların yoxlanılması müəyyən vaxt tələb etdiyindən nəticələrin iki həftə ərzində elan olunması nəzərdə tutulur.

Qeyd edək ki, bu gün saat 15:00-da DİM-in "YouTube" kanalı vasitəsilə canlı yayım təşkil olunacaq. Yayım zamanı ekspertlər imtahanda istifadə olunmuş test tapşırıqları ilə bağlı izahat verəcək, qapalı və kodlaşdırıla bilən açıq tipli tapşırıqların düzgün cavablarını açıqlayacaqlar.

Abituriyentlər suallarını DİM-in "Facebook" səhifəsində yayımlanacaq canlı yayımın şərh bölməsində ünvanlaya bilərlər.