Xəzər rayonunun Zirə qəsəbəsində yerləşən və sakinlərin istirahət məqsədilə istifadə etdikləri çimərlik ərazisində dəniz suyunun rənginin tünd qəhvəyi çalara çevrilməsi narahatlıq doğurub.
Qanuntv.az xəbər verir ki, sosial şəbəkələrdə yayılan görüntülərdə sahilboyu ərazidə suyun geniş hissəsinin palçıq rəngini xatırladan qəhvəyi çalara büründüyü aydın şəkildə müşahidə olunur.
Sakinlər suyun rənginin dəyişməsinin səbəblərini bilmədiklərini bildirərək, bunun ekoloji vəziyyətə və insanların sağlamlığına mümkün təsirləri ilə bağlı narahat olduqlarını qeyd ediblər.
Məsələ ilə bağlı Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən bildirilib ki, əməkdaşlar tərəfindən əraziyə baxış keçirilib və dəniz suyundan nümunələr götürülüb.
Qurumun açıqlamasına əsasən, götürülmüş nümunələr laborator müayinələr üçün Xidmətin tabeliyində fəaliyyət göstərən Mərkəzi Laboratoriyaya təqdim olunub.
"Hazırda nümunələr üzrə laborator analizlər aparılır. Nəticələr əldə edildikdən sonra ictimaiyyətə ətraflı məlumat veriləcək. Eyni zamanda, ilkin araşdırmalar zamanı sözügedən ərazidən Xəzər dənizinə doğru hər hansı axarın müşahidə edilmədiyi müəyyən olunub", – deyə məlumatda bildirilib.
Qeyd edək ki, laborator analizlərin nəticələri açıqlanana qədər dəniz suyunun rəng dəyişməsinin səbəbi ilə bağlı rəsmi mövqe hələlik məlum deyil.
