"Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı" çərçivəsində 2026–2027-ci tədris ili üzrə bakalavriat, magistratura və doktorantura səviyyələrinə qəbulun nəticələri açıqlanıb.
Elm və Təhsil Nazirliyinin yaydığı məlumata görə, müsabiqənin yekunlarına əsasən, seçim meyarlarına cavab verən namizədlər Dövlət Proqramına qəbul olunaraq proqram iştirakçısı statusu qazanıblar.
Bildirilib ki, 2026–2027-ci tədris ili üzrə ümumilikdə 500 nəfər xaricdə təhsil almaq hüququ əldə edib. Onlardan 125 nəfər bakalavriat, 353 nəfər magistratura, 22 nəfər isə doktorantura səviyyəsində təhsil alacaq.
Qeyd olunub ki, proqram iştirakçılarından 155 nəfər dünyanın ən nüfuzlu ilk 10 universiteti sırasında yer alan ali təhsil müəssisələrində təhsil alacaq. Bu universitetlər sırasında Stanford University, Massachusetts Institute of Technology (MIT), National University of Singapore, University of Oxford, University of California, Berkeley, ETH Zurich, Harvard University və Yale University kimi tanınmış ali təhsil ocaqları yer alır.
Nazirlikdən bildirilib ki, Dövlət Proqramının məqsədi Azərbaycanın gələcək inkişafı üçün yüksək ixtisaslı insan kapitalının formalaşdırılmasına töhfə vermək və gənclərin dünyanın aparıcı universitetlərində keyfiyyətli təhsil almasına dəstək göstərməkdir.
Təqaüd qazananların tam siyahısı Elm və Təhsil Nazirliyinin rəsmi internet səhifəsində yerləşdirilib.
