Azərbaycanın peşəkar MMA döyüşçüsü Elbəy Alışov ölkəmizə möhtəşəm çempionluq titulu ilə qayıdıb.
Qanuntv.az xəbər verir ki, peşəkar karyerasında məğlubiyyət yaşamayan və 11-0 rekorduna sahib olan idmançımız son qarşılaşmasında Monqolustan təmsilçisi Enx-Orgil Baatarkhuunu ikinci raundda nokauta salıb.
Bu parlaq qələbə Elbəy Alışova “ONE Championship” təşkilatının “bantamweight” divizionunda dünya çempionu kəmərini qazandırıb.
Titullu idmançımız Bakıya qayıdarkən hava limanında azarkeşlər tərəfindən böyük coşqu və izdihamla qarşılanıb. Alışov Azərbaycana dünya çempionu kimi dönməyin onun üçün qürurverici və xüsusi hiss olduğunu bildirib.
Döyüşü ikinci raundda nokautla başa çatdıran idmançı həlledici zərbənin əvvəlcədən hazırlanmış taktikanın nəticəsi olub-olmaması ilə bağlı da fikirlərini bölüşüb.
Peşəkar karyerasında keçirdiyi 11 görüşün hamısından qalib ayrılan Alışov gələcək planlarından da danışıb. O, ilk növbədə qazandığı çempionluq kəmərini qorumaq, eyni zamanda daha böyük və qlobal arenalarda mübarizə aparmaq niyyətində olduğunu bildirib.
Azərbaycanlı döyüşçü dünyanın ən nüfuzlu MMA təşkilatlarından biri olan UFC-yə keçid ehtimalı barədə də fikirlərini ifadə edib.
Qeyd edək ki, Elbəy Alışov peşəkar karyerasında keçirdiyi 11 döyüşün hamısında qələbə qazanaraq məğlubedilməzliyini qoruyur və Azərbaycan MMA-sının beynəlxalq arenadakı uğurlarına mühüm töhfə verir.
