İyulun 1-də Azərbaycan Milli Xalça Muzeyində “Xalça Muzeyi Fashion Show: Zamanın naxışları” adlı möhtəşəm moda nümayişi təşkil olunub.
Qanuntv.az xəbər verir ki, tədbirdə ictimaiyyət nümayəndələri, mədəniyyət xadimləri, dizaynerlər və sənətsevərlər iştirak ediblər.
Tədbirin açılışında çıxış edən Azərbaycan Milli Xalça Muzeyinin direktoru Əminə Məlikova bildirib ki, muzeyin tarixində ilk dəfə olaraq ekspozisiya və fondlarda qorunan Azərbaycan xalçalarının naxışlarından ilham alınaraq yerli modelyerlər tərəfindən yeni moda kolleksiyaları hazırlanıb.
Direktor qeyd edib ki, layihəyə qoşulan dizaynerlər böyük həvəslə təşəbbüsü dəstəkləyərək altı ay ərzində muzeyin kollektivi ilə sıx əməkdaşlıq ediblər. Onlar muzey fondlarında araşdırmalar aparıb, qədim xalça nümunələrini öyrənərək milli ornamentləri və bədii motivləri müasir geyim dizaynına uğurla inteqrasiya ediblər.
Əminə Məlikovanın sözlərinə görə, tədbir Azərbaycan Respublikası Prezidentinin müvafiq Sərəncamına uyğun olaraq görkəmli alim, xalçaşünas və rəssam Lətif Kərimovun anadan olmasının 120 illik yubileyinə həsr edilib.
Mədəniyyət nazirinin müavini Səadət Yusifova çıxışında vurğulayıb ki, Azərbaycan xalçası xalqımızın əsrlər boyu formalaşmış estetik zövqünü, mənəvi dəyərlərini, həyat tərzini və milli kimliyini özündə yaşadan əvəzsiz sənət nümunəsidir.
Nazir müavini bildirib ki, milli irsin qorunması ilə yanaşı, onun müasir dövrün tələblərinə uyğun şəkildə təqdim olunması da xüsusi əhəmiyyət daşıyır. Bu baxımdan dizayn və moda sənayesinin milli irsin təbliğində rolu getdikcə artır və ənənə ilə innovasiyanın vəhdəti mədəni irsimizə yeni nəfəs verir.
Tədbir çərçivəsində layihə üçün xüsusi hazırlanmış videoçarx nümayiş etdirilib.
“Xalça Muzeyi Fashion Show: Zamanın naxışları” layihəsi Azərbaycan xalqının zəngin milli-mədəni irsinin müasir moda dili ilə təqdim olunmasına həsr edilib və ölkənin tanınmış modelyerlərini vahid yaradıcı platformada bir araya gətirib.
Moda nümayişində Azərbaycan xalçaçılıq sənətinin zəngin ənənələri, milli ornamentlər və qədim simvollar müasir estetik baxış prizmasından təqdim olunub. Layihənin əsas ilham mənbələrindən biri də bu il 120 illik yubileyi qeyd edilən görkəmli xalçaşünas alim və rəssam Lətif Kərimovun zəngin yaradıcılığı olub.
Dizaynerlər tərəfindən Lətif Kərimovun yaratdığı xalça kompozisiyaları, naxışlar, rəng harmoniyası və bədii-estetik prinsiplər müasir geyim kolleksiyalarında yaradıcı şəkildə əks etdirilib.
Moda nümayişində 14 tanınmış modelyer-dizayner – Fəxriyyə Xələfova, Gülnarə Xəlilova, Leyla Əhmədova, Yeganə Sadıqova, Mətanət Bayramova, Xəyalə Məsimova, Səbinə Zülalova, Leyla Babazadə, Günay Əliyeva, Şəbnəm Bayramova, Əcəmi Azər, Kübra Nuriyeva, Afaq İsmayılzadə və Xəyalə Bayramovanın hazırladığı ümumilikdə 116 geyim tamaşaçılara təqdim olunub.
Layihənin əsas məqsədi Azərbaycan xalçaçılıq sənətinin təbliği, milli-mədəni irsin qorunaraq gələcək nəsillərə ötürülməsi, həmçinin bu zəngin irsin müasir təqdimat vasitələri ilə daha geniş auditoriyaya çatdırılmasıdır.
