Azərbaycan Milli Xalça Muzeyində Birinci Türkoloji Qurultayın 100 illiyinə həsr olunan “Türk Dünyası Həftəsi” çərçivəsində “Bir mədəniyyət xəzinəsi: Divanü lüğat-it-türk” adlı sərginin açılış mərasimi keçirilib.
QanunTV.az xəbər verir ki, tədbirdə Azərbaycan və Türkiyədən olan mədəniyyət nümayəndələri, elm xadimləri və qonaqlar iştirak ediblər.
Mərasimdə çıxış edən Milli Xalça Muzeyinin direktoru Əminə Məlikova bildirib ki, sərgi Azərbaycanın Mədəniyyət Nazirliyi, Türkiyənin Mədəniyyət və Turizm Nazirliyi, Milli Təhsil Nazirliyi, Yunus Əmrə İnstitutu, Olğunlaşma İnstitutları və Azərbaycan Milli Xalça Muzeyinin birgə dəstəyi ilə hazırlanıb.
Qeyd olunub ki, sərgi türk dünyasının zəngin dil, tarix və mədəni irsinin nümayişinə xidmət edir. Ekspozisiya ziyarətçilərə “Divanü lüğat-it-türk” əsərinin daşıdığı mənəvi və mədəni dəyərləri daha yaxından tanımaq, minillik irsin müasir bədii yanaşmalarla təqdim olunmasını görmək imkanı yaradır.
Çıxış edənlər bildiriblər ki, “Divanü lüğat-it-türk” türk dillərinin zənginliyini, xalqların tarixi yaddaşını və ortaq mədəni dəyərlərini özündə əks etdirən ən mühüm yazılı mənbələrdən biridir.
Sərgidə əsərin ideya və məzmunundan ilhamlanan müxtəlif sənət nümunələri təqdim olunur. Burada toxuculuq, tikmə, keramika, ağac və metal işləmə sənətinə aid nümunələr, yazı mədəniyyətini əks etdirən əşyalar, kitab cildləri, eləcə də miniatür sənəti vasitəsilə yaradılmış tarixi-mədəni səhnələr nümayiş etdirilir.
Tədbirdə qeyd olunub ki, ekspozisiyada təqdim edilən əsərlər türk xalqlarının tarixi, məişəti, sosial həyatı və ortaq dəyərlərini müasir sənət dili ilə ziyarətçilərə çatdırır.
Açılış mərasimi bədii proqramla davam edib. Azərbaycan Milli Konservatoriyasının aşıqlar dəstəsi musiqi nömrələri ilə çıxış edib.
Daha sonra qonaqlar sərgi ilə tanış olublar.
“Bir mədəniyyət xəzinəsi: Divanü lüğat-it-türk” sərgisi iyulun 13-dək davam edəcək.
