Ermənistanın sabiq baş naziri Hrant Baqratyan Azərbaycanın neft məhsullarının Ermənistana ixracı ilə bağlı növbəti dəfə əsassız və populist iddialarla çıxış edib. O, guya erməni oliqarxlarının Azərbaycandan alınan neft məhsulları vasitəsilə Azərbaycan büdcəsini doldurduğunu və bu vəsaitlərin sonradan Ermənistana qarşı silaha çevrildiyini iddia edib.
Baqratyan, həmçinin Azərbaycan və Türkiyə ilə iqtisadi əlaqələrin məhdudlaşdırılmalı olduğunu, bu ölkələrdən edilən idxalın ixracla balanslaşdırılmasının vacibliyini bildirib. Onun fikrincə, əks halda Ermənistan bu ölkələrin silahlı qüvvələrini maliyyələşdirmiş olur.
Mövzu ilə bağlı “Yeni Müsavat”a açıqlama verən sabiq maliyyə naziri, “Ekonomiks” Beynəlxalq İqtisadi Araşdırmalar İctimai Birliyinin sədri Fikrət Yusifov bu fikirləri sərt şəkildə tənqid edib. O bildirib ki, Baqratyanın səsləndirdiyi iddialar heç bir iqtisadi və məntiqi əsaslara söykənmir:
“Bu cür bəyanatlar Ermənistanda Rusiyanın təsiri altında olan ‘beşinci kolon’un növbəti sərsəmləməsidir. Azərbaycan büdcəsinin erməni pulu ilə dolması absurddur. Azərbaycanın əsas enerji gəlirləri Türkiyə, Avropa ölkələri, İsrail və Gürcüstan kimi strateji tərəfdaşlardan formalaşır.”
F.Yusifov qeyd edib ki, Azərbaycanın maliyyə imkanları Ermənistanın imkanları ilə müqayisə edilə bilməz və bunu Ermənistanın keçmiş rəhbərləri də çox yaxşı bilirlər. Onun sözlərinə görə, bu cür bəyanatların məqsədi cəmiyyətdə gərginlik yaratmaq və revanşist ovqatı diri saxlamaqdır.
İqtisadçı hazırkı Ermənistan rəhbərliyinin fərqli mövqe sərgilədiyini də vurğulayıb:
“Nikol Paşinyan son illərdə Ermənistanın müstəqil və normal dövlətə çevrilməsi üçün addımlar atır. Ermənistan cəmiyyətinin artıq 75–80 faizi revanşist çağırışlardan uzaqlaşıb və regionda sülhün tərəfdarıdır.”
Fikrət Yusifovun fikrincə, gələcəkdə Azərbaycan–Ermənistan ticarət əlaqələri bərpa olunsa belə, Ermənistan bu münasibətlərdə əsasən mənfi ticarət balansına malik olacaq:
“Ermənistanın Azərbaycana ixrac edəcəyi məhsullar neft və qaz kimi strateji resurslarla müqayisə edilə bilməz. Buna baxmayaraq, regionda davamlı sülh və əməkdaşlıq naminə iqtisadi əlaqələrin qurulması vacibdir.”