Qanuntv.az xəbər verir ki, qanunvericiliyə edilən son dəyişikliklərə əsasən bir sıra sahələr üzrə cərimələr və cəzalar artırılır, bəzi hallarda inzibati həbs və hətta azadlıqdan məhrumetmə nəzərdə tutulur.
Belə ki, sosial şəbəkələrdə cəmiyyətə açıq şəkildə hörmətsizlik edən şəxslər barəsində inzibati həbs və ya cərimə tədbirləri tətbiq olunacaq.
Eyni zamanda dəbilqəsiz moped idarə edən sürücülər üçün cərimələr müəyyənləşdirilir. Bu dəyişiklik yol hərəkəti təhlükəsizliyinin artırılmasına xidmət edir.
Qanunvericiliyə edilən digər dəyişikliklərə əsasən, binaların enerji effektivliyi üzrə pasportlaşdırılması tələbinin pozulmasına görə də inzibati cərimələr tətbiq olunacaq.
Bundan əlavə, əkin sahələrinin yandırılması ilə bağlı məsuliyyət daha da sərtləşdirilir. Yeni qaydalara əsasən bu hallara görə cərimələrlə yanaşı inzibati həbs də nəzərdə tutulur.
Mədəni sərvətlərin ehtiyatsızlıqdan məhv edilməsi artıq daha ağır məsuliyyət yaradır. Bu əməllərə görə şəxslər 2 ilədək azadlıqdan məhrum edilə bilərlər.
Eyni zamanda, milli mədəni irs obyektlərinin Azərbaycandan qanunsuz aparılmasına görə cərimələr iki dəfə artırılır.
Qanun dəyişiklikləri çərçivəsində tarix və mədəniyyət abidələrinin qəsdən məhv edilməsinə görə cəzalar da sərtləşdirilir.
Qeyd edək ki, bu dəyişikliklər cəmiyyətin təhlükəsizliyi, ekoloji tarazlığın qorunması və milli-mədəni irsin mühafizəsinin gücləndirilməsinə yönəlib.