Qanuntv.az xəbər verir ki, qeyri-formal məşğulluğun təsir dairəsinə düşən şəxslər icbari tibbi sığorta üzrə sığortalı qismində özləri çıxış edəcəklər. Bu, Prezident İlham Əliyevin təsdiqlədiyi “Tibbi sığorta haqqında” qanuna edilən dəyişiklikdə əksini tapıb.
Qanuna əsasən, həmin şəxslər müvafiq icra hakimiyyəti orqanının müəyyən etdiyi qurum tərəfindən müəyyən edilən məbləğdə icbari tibbi sığorta haqları ödəyəcəklər. Əgər sığorta haqqını ödəmək öhdəliyi təqvim ili ərzində yaranarsa, məbləğ 12-yə bölünəcək və öhdəliyin yarandığı ay da daxil olmaqla ilin sonunadək olan ayların sayına uyğun hesablanacaq.
Sığorta haqlarının ödənilməsi müddətləri pozulduğu halda isə müəyyən edilmiş məbləğin 10 faizi həcmində əlavə sığorta haqqı tətbiq olunacaq.
Qeyd edək ki, qeyri-formal məşğulluq dedikdə Əmək Məcəlləsinə uyğun olaraq əmək müqaviləsi və ya Mülki Məcəlləyə əsasən mülki-hüquqi müqavilə bağlanılmadan fəaliyyət göstərilməsi, Vergi Məcəlləsinə uyğun olaraq sahibkarlıq fəaliyyətinin və ya kənd təsərrüfatına yararlı torpaqdan istifadənin rəsmiləşdirilmədən həyata keçirilməsi, eləcə də “Ailə kəndli təsərrüfatı haqqında” qanuna uyğun olaraq yerli özünüidarəetmə orqanlarında uçota durmadan ailə kəndli təsərrüfatının təşkili yolu ilə gəlir əldə edilməsi nəzərdə tutulur.