Prezident İlham Əliyevin müvafiq Sərəncamı ilə "Ümumi təhsil haqqında" Azərbaycan Respublikası Qanununa edilən dəyişiklik nəticəsində müəllimlərin işə qəbulu üzrə müsabiqə (MİQ) ilk dəfə iştirak edən şəxslər üçün ödənişsiz, təkrar iştirak etmək istəyənlər üçün isə ödənişli olacaq.
Elm və Təhsil Nazirliyindən Oxu.az-a verilən məlumatda bildirilib ki, dəyişiklik sosial müdafiəyə xüsusi ehtiyacı olan şəxslərə şamil edilir. Belə ki, əlilliyi olan şəxslər, ünvanlı dövlət sosial yardımı alan ailələrin üzvləri, şəhid ailəsi üzvləri və Azərbaycan Respublikasının ərazi bütövlüyü uğrunda döyüş əməliyyatlarında iştirak etmiş "Müharibə veteranı" adı almış şəxslər MİQ müsabiqəsində təkrar iştirak etdikdə ödənişdən azad olunurlar.
Nazirlik vurğulayıb ki, qanuna edilən dəyişiklik MİQ müsabiqəsinin dayanıqlılığını təmin etməklə, iştirakçıların məsuliyyətini artırır və büdcə vəsaitlərinin daha səmərəli istifadəsinə şərait yaradır. Eyni zamanda bu yanaşma sosial ədalətliliyi qoruyaraq müəllim seçimində keyfiyyətin yüksəldilməsinə və təkrar, məqsədsiz müraciətlərin qarşısının alınmasına xidmət edir.
Qeyd olunub ki, xərclərin optimallaşdırılması baxımından bu metod beynəlxalq təcrübədə də geniş tətbiq olunur.