İspaniyanın Madrid şəhərində keçirilən “Madrid Fusion 2026” Beynəlxalq Qastronomiya Konqresində Azərbaycanın qastroturizm imkanları tanıdılıb.
Qanuntv.az xəbər verir ki, 26–28 yanvar tarixlərini əhatə edən tədbirdə ölkəmiz milli qastronomiya stendi ilə təmsil olunub. Stenddə Azərbaycan mətbəxinə məxsus yeməklər, Slou Fud təşkilatının “Dad gəmisi” siyahısına daxil edilən biomüxtəliflik nümunələri, milli qənnadı məmulatları və quru meyvələr nümayiş etdirilib və ziyarətçilərə təqdim olunub.
Konqres çərçivəsində Azərbaycan mətbəxinə həsr olunmuş iki ustad dərsi təşkil edilib, qastroturizm imkanlarını əks etdirən videoçarxlar nümayiş olunub, milli mətbəx nümunələrinin dequstasiyası keçirilib.
Azərbaycanın İspaniya Krallığındakı fövqəladə və səlahiyyətli səfiri, eyni zamanda BMT Turizm Təşkilatı yanında daimi nümayəndə Ramiz Həsənov milli stendi ziyarət edərək təqdim olunan məhsullarla tanış olub. Stendi həmçinin “elBulli” fondunun direktoru, üç “Michelin” ulduzuna layiq görülmüş məşhur aşpaz Ferran Adrià da ziyarət edib.
Tədbir çərçivəsində Dövlət Turizm Agentliyi sədrinin müavini Azadə Hüseynova ilə beynəlxalq qastronomik reytinq təşkilatı olan “La Liste”nin beynəlxalq direktoru Stefani Kim arasında görüş keçirilib. Görüşdə Azərbaycanın qastronomiya məhsullarının beynəlxalq miqyasda tanıdılması və mümkün əməkdaşlıq perspektivləri müzakirə olunub.
Bununla yanaşı, “Madrid Fusion”un qurucusu, “Gastroactitud” rəqəmsal qastronomiya jurnalının təsisçisi Jose Carlos Capel ilə Azərbaycanın kulinariya irsinin beynəlxalq platformalarda təqdimatı ilə bağlı fikir mübadiləsi aparılıb.
Qastronomiya üzrə ekspertlər, İspaniya Aşpazlar və Şirniyyatçılar Federasiyası (FACYRE) və İspaniya Qonaqpərvərlik Biznesləri Konfederasiyasının (HOSTELERÍA DE ESPAÑA) nümayəndələri ilə keçirilən görüşlərdə əməkdaşlıq imkanları, Azərbaycana məxsus məhsulların tanıdılması, Abşeron zəfəranının unikallığı və zəfəran yığımı marşrutlarının yaradılması kimi mövzular diqqət mərkəzində olub.
Qeyd edək ki, “Madrid Fusion” hər il keçirilən və dünya üzrə qida sənayesi, turizm və qastronomiya sahəsində nüfuzlu platforma hesab olunan beynəlxalq tədbirdir.
