Qanuntv.az xəbər verir ki, Azərbaycan Respublikasının Prezidenti fevralın 13-də Münxen şəhərində “France 24” telekanalına müsahibə verib.
Müsahibə zamanı jurnalist Bakı Hərbi Məhkəməsi tərəfindən Ermənistan vətəndaşları barəsində çıxarılan hökmlər və onların mümkün əfvi məsələsinə toxunub.
Bizim.Media-nın yaydığı məlumata görə, Prezident bildirib ki, ABŞ vitse-prezidenti Cey Di Vens ilə keçirilən görüş zamanı bu məsələ qaldırılsa da, Azərbaycan tərəfi mövqeyini qarşı tərəfə açıq şəkildə çatdırıb.
Dövlət başçısı qeyd edib ki, əsas müzakirələr ikitərəfli münasibətlər, regional inkişaf, eləcə də Ermənistan ilə rəsmi sülh perspektivləri ətrafında aparılıb.
Prezident vurğulayıb ki, mühakimə olunan şəxslər Azərbaycan ərazisində fəaliyyət göstərmiş qanunsuz separatçı rejimin rəhbərləri olub və uzun illər azərbaycanlılara qarşı törədilən müharibə cinayətlərinə görə məsuliyyət daşıyırlar. Onlar həyata keçirilmiş hərbi əməliyyatlardan sonra saxlanılıb, vəkillərlə təmin edilib və məhkəmə prosesi tam şəffaf şəkildə keçirilib.
Əfv ehtimalı barədə suala cavabında Prezident bildirib ki, bu şəxslər bəşəriyyətə qarşı ağır cinayətlər törədiblər və belə hallarda hər hansı güzəştdən söhbət gedə bilməz.
Prezident əlavə edib ki, törədilən cinayətlər miqyasına görə tarixdə baş verən ən ağır müharibə cinayətləri ilə müqayisə oluna bilər və bu səbəbdən onların azad edilməsi məsələsi gündəmdə deyil.
