Prezident İlham Əliyev “Yerin təki haqqında” Azərbaycan Respublikasının Qanununda dəyişiklik edilməsi barədə qanunu imzalayıb.
Qanuntv.az xəbər verir ki, yeni dəyişikliklərə əsasən, su anbarlarında və sututarlarda toplanan çöküntülərin (qum, qum-çınqıl, gil), həmçinin tunel və keçidlərin tikintisi zamanı yerin təkindən çıxarılan süxurların istifadəsi artıq yerin təkindən istifadənin növləri sırasına daxil edilib.
Bu dəyişiklik ölkədə su ehtiyatlarının artırılması, əhalinin keyfiyyətli içməli və suvarma suyu ilə təminatının yaxşılaşdırılması məqsədi daşıyır. Belə ki, su anbarlarının təmizlənməsi zamanı çıxarılan milyonlarla kubmetr materialların iqtisadi dövriyyəyə cəlb olunması mümkün olacaq.
Eyni zamanda yol infrastrukturunun inkişafı çərçivəsində tikilən tunellər zamanı çıxarılan süxurların istifadəsinin hüquqi əsasları yaradılır. Bu isə həmin resursların qanuni istifadəsinə, hesabatlılığın artırılmasına və rəqabət mühitinin formalaşmasına şərait yaradacaq.
Dəyişikliklər çərçivəsində yerin təkinin istifadəyə verilməsi qaydaları da təkmilləşdirilir. Artıq bu sahədə birbaşa danışıqlar yolu ilə istifadə hüququnun verilməsi mexanizmi hüquqi əsas qazanır və şəffaflıq artırılır. Bu qaydalar Nazirlər Kabineti tərəfindən təsdiqlənəcək.
Qanunda həmçinin dağ-mədən fəaliyyəti zamanı yaranan istehsal tullantılarından istifadə hüququnun verilməsi ilə bağlı yeni yanaşma müəyyən olunub. Bu hüquq xüsusi qaydalara uyğun şəkildə təqdim ediləcək.
Bununla yanaşı, yer təki sahələrinin rekultivasiyası ilə bağlı mühüm tələblər də müəyyən edilir. Artıq yer təki istifadəçiləri torpaqların münbitliyinin qorunması və bərpası üçün rekultivasiya planları hazırlamalı, bu planları dövlət ekoloji ekspertizasından keçirməlidirlər. Məqsəd torpaqların əvvəlki və ya alternativ faydalı vəziyyətə qaytarılması və ətraf mühitin qorunmasıdır.
Qeyd edək ki, yeni dəyişikliklər təbii ehtiyatlardan istifadənin səmərəliliyinin artırılmasına, ekoloji təhlükəsizliyin təmin olunmasına və dağ-mədən fəaliyyəti nəticəsində yaranan tullantıların iqtisadi dövriyyəyə cəlb edilməsinə xidmət edəcək.
Eyni zamanda dövlət başçısı bu dəyişikliklərin tətbiqini təmin etmək məqsədilə əlavə fərman da imzalayıb. Fərmana əsasən, qeyri-filiz faydalı qazıntı yataqlarının istismarı ilə məşğul olan yer təki istifadəçilərinin fəaliyyətinin sağlamlaşdırılması ilə bağlı qaydalar təsdiqlənib.
