ABŞ rəsmiləri ilə aparılacaq dialoq ərəfəsində İran nümayəndə heyəti Pakistanın baş naziri Şahbaz Şərif ilə görüş keçirib.

Məlumata görə, İran təmsilçiləri Birləşmiş Ştatların nümayəndələri ilə müzakirələrdən öncə Pakistan hökumətinin rəhbəri ilə bir araya gəliblər. Görüşdə əsas məqsəd qarşıdakı danışıqların formatının dəqiqləşdirilməsi olub.

Sözügedən nümayəndə heyətinə İran Parlamentinin spikeri Məhəmməd Baqir Qalibaf rəhbərlik edir. Bildirilib ki, İran tərəfi Pakistanla təmaslar zamanı ABŞ ilə keçiriləcək danışıqların əsas istiqamətlərini müzakirə edib.

Qeyd olunub ki, Pakistan tərəfi İslamabad şəhərində baş tutacaq Tehran və Vaşinqton nümayəndələrinin birbaşa görüşlərində vasitəçi rolunu oynayır. Görüş zamanı İran nümayəndələrinin ABŞ-nin atəşkəs şərtlərini pozması məsələsini gündəmə gətirəcəyi gözlənilir.

Məhəmməd Baqir Qalibaf bildirib ki, əgər Vaşinqton bu dialoqu nümayiş xarakterli məqsədlər üçün istifadə edərsə, Tehran buna adekvat reaksiya verəcək.

Eyni zamanda, Pakistanın baş naziri Şahbaz Şərif ABŞ nümayəndə heyəti ilə də görüş keçirib və tərəflər arasında danışıqların müsbət nəticələnəcəyinə ümid etdiyini vurğulayıb.

Sonda qeyd olunub ki, İran və ABŞ nümayəndələri konstruktiv əməkdaşlığa və qarşılıqlı dialoqa sadiq qaldıqlarını ifadə ediblər.