Bakı Ali Neft Məktəbinin (BANM) V kurs tələbəsi Röya Qasımova Böyük Britaniyanın nüfuzlu ali təhsil müəssisələrindən biri olan Imperial College London-un Maliyyə və mühasibat ixtisası üzrə magistratura pilləsinə qəbul olunub.

Məlumata görə, R.Qasımova 2021-ci ildə II qrup üzrə 683.2 bal toplayaraq ölkə ikincisi olub və Prezident təqaüdünə layiq görülüb. O, eyni zamanda təhsilini Bakı Ali Neft Məktəbində davam etdirib.

Qeyd olunur ki, tələbə 2024-cü ildə mübadilə proqramı çərçivəsində Almaniyada yerləşən Schmalkalden Tətbiqi Elmlər Universitetində bir semestr təhsil alıb.

Həmçinin o, ACCA proqramı üzrə 2024-cü ilin dekabr sessiyasında “Financial Reporting” imtahanından 95% nəticə göstərərək ölkə üzrə ən yüksək bal toplayıb və “National Prizewinner” adına layiq görülüb.

BANM tələbəsinin bu uğuru həm akademik göstəriciləri, həm də beynəlxalq təcrübəsi ilə diqqət çəkir və gənclər üçün nümunə kimi qiymətləndirilir.