Azərbaycan Respublikasının Prezidenti İlham Əliyev Somali Federativ Respublikasının ölkəmizdə yeni təyin olunmuş fövqəladə və səlahiyyətli səfiri Abdinur Dahir Fidounu qəbul edib.
Qanuntv.az xəbər verir ki, səfir etimadnaməsini dövlət başçısına təqdim edib və Prezident İlham Əliyevlə söhbət aparıb.
Görüş zamanı səfir Somali Prezidenti Hasan Şeyx Mahmudun salamlarını dövlət başçısına çatdırıb. Prezident İlham Əliyev isə qarşı tərəfin salamlarına görə minnətdarlığını bildirib və öz salamlarını Somali Prezidentinə çatdırmağı xahiş edib.
Dövlət başçısı ötən il Somali Prezidentinin Azərbaycana rəsmi səfərini xatırladaraq həmin səfər çərçivəsində ikitərəfli münasibətlərin inkişafı ilə bağlı səmərəli müzakirələrin aparıldığını və bir sıra sənədlərin imzalandığını qeyd edib.
Prezident İlham Əliyev Azərbaycan və Somali arasında mövcud siyasi əlaqələrin yüksək səviyyədə olduğunu vurğulayaraq iqtisadi əməkdaşlığın genişləndirilməsinin vacibliyini diqqətə çatdırıb.
Səfir Abdinur Dahir Fidou ölkələr arasında münasibətlərin inkişafı üçün səylər göstərəcəyini bildirib.
Görüşdə ikitərəfli və çoxtərəfli formatlarda əməkdaşlığın genişləndirilməsi, eləcə də iqtisadiyyat, ticarət, təhsil və digər sahələrdə əlaqələrin inkişaf etdirilməsi perspektivləri müzakirə olunub.
Həmçinin Somalidə “ASAN xidmət” təcrübəsinin tətbiqi və tələbə mübadiləsi sahəsində əməkdaşlıq məsələlərinə toxunulub.
