Azərbaycanın haqlı səsini daha gür çatdırmaq və soyqırımı faktlarını strateji müstəvidə təhlil etmək məqsədilə "Xocalı Soyqırımını Tanıtma" ictimai birliyi ilə Türk Strateji Düşünmə Mərkəzi arasında mühüm əməkdaşlıq Memorandumu imzalanıb.

Mərasimdə çıxış edən "Xocalı Soyqırımını Tanıtma" ictimai birliyinin Ağsaqqallar Şurasının sədri, tibb elmləri doktoru, professor Mübariz Allahverdiyev bu sənədin tarixi əhəmiyyətinə toxunub. O, beyin mərkəzlərinin birgə fəaliyyətinin ölkəmiz üçün xeyirli və düşərli olmasını diləyərək, milli yaddaşın qorunması yolunda bu cür tərəfdaşlıqların zəruriliyini vurğulayıb.

Tədbirin ən yaddaqalan anlarından biri Əməkdar həkim Taryel Eyvazovun çıxışı olub. T.Eyvazov 1992-ci ilin fevralında baş vermiş qanlı soyqırımı haqqında danışarkən, o dövrün çətinliklərini və informasiya blokadasını xatırladıb.

O, xüsusi olaraq vurğulayıb ki, faciənin baş verdiyi ilk anlarda – hər kəsin tərəddüd və məlumat qıtlığı içində olduğu bir vaxtda – Xocalı barədə ilk dəqiq məlumatların Bakıya çatdırılmasında və ölkə mətbuatında dərc olunmasında Mübariz Allahverdiyev və Şamil Sabiroğlunun misilsiz xidmətləri olmuşdur. Taryel Eyvazov bu tarixi faktın unudulmaz olduğunu bildirərək, imzalanan memoranduma öz xeyir-duasını verib və bu addımın milli davamızda yeni uğurlara vəsilə olmasını arzulayıb.

Xəbəri təqdim edən birliyin İdarə heyətinin üzvü Əziz İsmayılov qeyd edib ki, imzalanan sənəd çərçivəsində tərəflər həm ölkə daxilində, həm də beynəlxalq səviyyədə birgə konfranslar, elmi araşdırmalar və təbliğat layihələri həyata keçirəcəklər.

Bu əməkdaşlıq, Xocalı faciəsinin təkcə bir kədər deyil, həm də strateji bir mövqe olaraq araşdırılmasına və gələcək nəsillərə daha dəqiq çatdırılmasına xidmət edəcək.
Mənbə: Realmedia.info
Müəllif: Əziz İsmayılov