Aprelin 22-də Azərbaycanın Milli Qəhrəmanı Allahverdi Bağırovun anadan olmasının 80-ci ildönümü tamam olur.
Qanuntv.az xatırladır ki, Qarabağ müharibəsində göstərdiyi şücaət və qəhrəmanlığı ilə yadda qalan Allahverdi Bağırov erməni silahlı birləşmələrinə qarşı ilk özünümüdafiə dəstələrinin yaradıcılarından biri olub və Qarabağ müqavimətinin simvollarından sayılıb.
Allahverdi Teymur oğlu Bağırov 1946-cı il aprelin 22-də Ağdam şəhərində anadan olub. Ailədə yeddi qızdan sonra dünyaya gəldiyi üçün ona “Allahverdi” – “Allahın payı” adı verilib.
O, orta təhsilini Ağdam şəhər 1 saylı məktəbdə alıb. Uşaqlıq illərindən idmana böyük maraq göstərən Bağırov futbol, yüngül atletika və voleybol üzrə keçirilən yarışlarda fəal iştirak edib. Bir müddət Qarabağ FK klubunun heyətində çıxış edib, 1976-cı ildə isə klubun baş məşqçisi təyin olunaraq komandanın uğurlarında mühüm rol oynayıb.
1988-ci ildən başlayaraq Qarabağda baş verən hadisələr zamanı azərbaycanlıların təşkilatlanmasında Bağırov qardaşlarının xüsusi rolu olub. 1991-ci ildə yaradılan 845 nömrəli Ağdam Ərazi Özünümüdafiə taborunun təşkilatçıları da məhz onlar idi. Qardaşı Eldar Bağırovun qətlə yetirilməsindən sonra tabora rəhbərlik Allahverdi Bağırova həvalə olunub.
Onun komandanlığı altında Azərbaycan döyüşçüləri bir sıra uğurlu əməliyyatlar həyata keçirib. Xüsusilə 1992-ci ilin fevralında Xocalı faciəsi zamanı mülki əhalinin xilas edilməsində böyük xidmət göstərib. Həmin dövrdə erməni tərəfin nümayəndəsi Vitali Balasanyanla aparılan danışıqlar nəticəsində yüzlərlə əsir azad olunub, çoxsaylı şəhidin cənazəsi geri qaytarılıb.
Allahverdi Bağırovun fəaliyyəti həm də Fəryad filmində bədii şəkildə əks etdirilib.
1992-ci ilin iyun ayında sonuncu döyüş əməliyyatlarından sonra geri qayıdarkən minaya düşən maşında Allahverdi Bağırov sürücüsü və həkimlə birlikdə şəhid olub.
Ölümündən sonra – 24 fevral 1993-cü ildə ona “Azərbaycanın Milli Qəhrəmanı” adı və “Qızıl ulduz” medalı verilib.
Qeyd edək ki, Ağdamın işğaldan azad edilməsindən sonra Allahverdi Bağırovun ailə üzvləri uzun illərdən sonra onun məzarını ziyarət etmək imkanı əldə ediblər.
