“Avropa siyasətində ‘demokratiyanın səsi’ kimi təqdim olunan European Parliament son illər Azərbaycana münasibətdə getdikcə daha çox sual doğuran, qərəzli və selektiv yanaşmaları ilə diqqət çəkir”.
Qanuntv.az xəbər verir ki, bu fikirləri deputat Vüqar İskəndərov Avropa Parlamentinin Azərbaycana qarşı qəbul etdiyi qətnaməni şərh edərkən deyib.
Deputatın sözlərinə görə, rəsmi Bakı dəfələrlə bu qurumu obyektiv mövqeyə çağırsa da, qəbul edilən qətnamələr və verilən bəyanatlar göstərir ki, burada prinsipiallıqdan daha çox siyasi sifarişlər və lobbi maraqları üstünlük təşkil edir.
O bildirib ki, Azərbaycanın bu qurumla münasibətləri rəsmi şəkildə dayandırmaq qərarı təsadüfi addım deyil və bu, uzun müddətdir yığılıb qalan narazılıqların məntiqi nəticəsidir.
“Milli Məclis tərəfindən qəbul edilən bu qərar Avropa Parlamenti ilə bütün istiqamətlər üzrə əməkdaşlığın dayandırılması, o cümlədən Avronest Parlament Assambleyası çərçivəsində fəaliyyətə xitam verilməsi ilə formal münasibətlərin belə mənasını itirdiyini göstərir”, – deyə deputat vurğulayıb.
Vüqar İskəndərov qeyd edib ki, aprelin 30-da qəbul edilən qətnamədən sonra European Union səfirinin Xarici İşlər Nazirliyinə çağırılması və etiraz notasının təqdim olunması vəziyyətin ciddiliyini ortaya qoyur.
Onun fikrincə, xüsusilə Vətən müharibəsindən sonra Avropa Parlamenti Azərbaycana qarşı ardıcıl şəkildə qərəzli mövqe sərgiləyib və qəbul edilən çoxsaylı qətnamələr birtərəfli məlumatlara əsaslanıb.
Deputat bildirib ki, Prezident Ilham Əliyev hələ 2026-cı ilin yanvarında “Euronews” telekanalına müsahibəsində Avropa Parlamentində formalaşan anti-Azərbaycan mövqeyinin müəyyən lobbi qruplarının təsiri ilə bağlı olduğunu qeyd etmişdi.
O əlavə edib ki, son illərdə Avropa Parlamentinin özü də müxtəlif qalmaqallarla, xüsusilə “Qatargeyt” kimi korrupsiya iddiaları ilə gündəmə gəlib və bu da qurumun şəffaflığı ilə bağlı ciddi suallar yaradıb.
“Bu fonda digər ölkələrə demokratiya dərsi keçmək ən azı paradoksal görünür. Qəbul edilən qətnamələr hüquqi deyil, daha çox siyasi xarakter daşıyır və regionda sülhə deyil, gərginliyin artmasına xidmət edir”, – deyə V.İskəndərov bildirib.
Deputat sonda vurğulayıb ki, Azərbaycanın Avropa Parlamenti ilə münasibətləri dayandırması emosional deyil, rasional və prinsipial qərardır və bu addım ölkənin suveren siyasətinə hörmət tələbini bir daha nümayiş etdirir.
