Bu ilin yanvar-mart aylarında Azərbaycana Avropa ölkələrindən 41 min 941 turist səfər edib.

Qanuntv.az xəbər verir ki, rəsmi statistikaya əsasən, bu göstərici ötən ilin eyni dövrü ilə müqayisədə 15 faiz çoxdur.

Məlumata görə, hesabat dövründə Şərqi Avropa ölkələrindən Azərbaycana 20 min 731 turist gəlib ki, bu da bir il əvvələ nisbətən 3,5 faiz artım deməkdir. Şərqi Avropa ölkələri arasında ən çox turist Ukraynadan gəlib. Belə ki, üç ay ərzində Ukraynadan Azərbaycana 7 min 688 nəfər səfər edib.

Qərbi Avropa ölkələrindən isə ölkəmizə 21 min 210 turist gəlib. Bu göstərici ötən ilin eyni dövrü ilə müqayisədə 29 faiz çoxdur. Qərbi Avropa ölkələri arasında ən çox turist Böyük Britaniyadan qeydə alınıb. Hesabat dövründə bu ölkədən Azərbaycana 5 min 668 nəfər səfər edib.

Statistikaya əsasən, Almaniya, İtaliya, Fransa, Belçika, Portuqaliya, Avstriya və digər Avropa ölkələrindən gələn turistlərin sayında da artım müşahidə olunub.

Ümumilikdə isə bu ilin ilk üç ayında Azərbaycana 172 ölkədən 484 min 400 əcnəbi və vətəndaşlığı olmayan şəxs gəlib. Bu göstərici ötən ilin eyni dövrü ilə müqayisədə 4,7 faiz azdır.